Mamadou Sakho verður um kyrrt

Mamadou Sakho verður um kyrrt hjá Liverpool. Þetta varð ljóst þegar lokað hafði verið fyrir félagskipti í gærkvöldi. 

Það var alveg á hreinu að Jürgen Klopp var búinn að leggja til að það kæmi Mamadou best að fara í lán. Frakkinn lét það vera og mun hafa hafnað öllum þreifingum í þá átt að fara í annað félag. Með því að vera um kyrrt gæti hann átt á hættu að spila bara með varaliðinu.

Mamadou var sendur heim úr Ameríkuferðinni eftir að hafa verið óstundvís og ekki sýnt nógu mikla einbeitingu. Jürgen gerði Frakkanum grein fyrir því að hann þyrfti að taka sig á og liður í því væri að fara í lán og sýna hvað væri í hann spunnið. Mamadou vildi ekki fara en vonandi tekur hann sig á þannig að hann verði liðinu sínu að gagni.