Derby County í deildarbikar

Í kvöld heimsækja Jurgen Klopp og hans liðsmenn Derby County í 3. umferð enska deildarbikarsins.  Búast má við einhverjum breytingum á byrjunarliðinu að þessu sinni.

Klopp sagði á blaðamannafundi í gær, mánudag, að hann myndi líklega gera einhverjar breytingar á liðinu en þó ekki mjög miklar þar sem hann sér ekki ástæðu til að hvíla þá leikmenn sem eru í góðu standi til að spila.  Emre Can er klár í slaginn að sögn þjálfarans og það þykir mjög líklegt að Þjóðverjinn spili þennan leik.  Sömu sögu má segja af landa hans Loris Karius en hann verður að öllum líkindum á milli stanganna í kvöld.  Þá hefur Roberto Firmino jafnað sig af meiðslum sínum sem héldu honum frá leiknum við Chelsea á föstudagskvöldið og kemur aftur inní leikmannahópinn.  Klopp vildi ekki segja mikið um hvort Danny Ings byrji leikinn en hann mun þó líklega vera í leikmannahópnum þar sem hann tók ekki þátt í góðum 6-2 sigri U-23 ára liðsins á Tottenham á mánudagskvöldið, Ovie Ejaria var sömuleiðis ekki með í þeim leik sem bendir til þess að hann verði í leikmannahópnum.

Heimamenn í Derby hafa ekki byrjað leiktíðina mjög vel en þeir sitja í 20. sæti deildarinnar með einn sigur, þrjú jafnefli og fjögur töp eftir fyrstu átta leikina.  Margir bjuggust við betri byrjun hjá þeim á tímabilinu þar sem liðið hefur undanfarin ár verið að berjast á toppi deildarinnar en það má gera ráð fyrir því að leikmenn liðsins líti á þennan leik sem gott tækifæri til að keyra tímabilið almennilega í gang.  Það er alltaf erfitt að mæta liðum í næst efstu deild á þeirra eigin heimavelli í bikarkeppni og leikurinn í kvöld verður væntanlega engin undantekning þar á.  Tveir fyrrum leikmenn Liverpool spila með Derby.  Markvörðurinn Scott Carson er þeirra aðalmarkvörður og svo er miðjumaðurinn Thomas Ince á mála hjá þeim en hann er sonur Paul Ince eins og margir vita.  Ince þótti mikið efni á árum áður hjá Liverpool en hefur kannski ekki náð að standa undir þeim væntingum sem til hans voru gerðar.

Það er töluvert langt síðan að þessi lið mættust síðast en það var í desember árið 2007 í úrvalsdeildinni.  Þá vannst 2-1 sigur á Pride Park þar sem þeir félagar Fernando Torres og Steven Gerrard skoruðu mörkin.  Mark Gerrard á 90. mínútu reyndist sigurmark leiksins.  Hrútarnir riðu ekki feitum hesti þetta tímabilið og féllu úr deildinni með aðeins 11 stig þegar upp var staðið.  Liðin hafa aðeins einu sinni áður mæst í deildarbikarnum en það var árið 1977.  Liverpool vann þann leik á Anfield 2-0 með mörkum frá David Fairclough.  Það ár fóru okkar menn alla leið í úrslit keppninnar en töpuðu fyrir Nottingham Forest í endurteknum úrslitaleik 0-1 eftir að fyrri leikurinn hafði endað markalaus.  Var það í fyrsta skipti í sögu félagsins sem liðið komst í úrslitaleik keppninnar en eins og allir vita hefur liðið verið sigursælt í þessari keppni í gegnum árin og unnið hana oftast allra liða á Englandi.

Við vonum að leikmenn haldi áfram góðri spilamennsku í þessum leik og spáin að þessu sinni er að sigur vinnst í markaleik, eigum við ekki að segja að lokatölur verði 1-3 fyrir gestina.  Liðið verður því í pottinum þegar dregið verður til fjórðu umferðar á miðvikudagskvöldið og það væri tilvalið að fá heimaleik næst þar sem nóg hefur verið af útileikjum það sem af er þessu tímabili.

Fróðleikur:

- Loris Karius spilar líklega sinn fyrsta leik fyrir félagið í kvöld.

- Daniel Sturridge, sem skoraði tvö mörk í síðasta deildarbikarleik, hefur skorað 6 mörk í 5 leikjum fyrir Liverpool í deildarbikarnum.

- Liverpool hafa unnið 21 leik af 26 leikjum sínum við Derby County í sögunni, tapað þremur og tvisvar sinnum gert jafntefli.

- Liverpool hefur aðeins einu sinni tapað í deildarbikarnum gegn liði úr neðri deildunum en það var gegn Northampton árið 2010.