Grujic tilnefndur til verðlauna

Fyrr í vikunni var tilkynnt um þá 40 leikmenn sem koma til greina sem Gulldrengur Evrópu eða eins og það heitir á ensku, 2016 Golden Boy award.  Marko Grujic er í þeim hópi.

Verðlaunin eru veitt til leikmanns sem er 21 árs eða yngri og þykir hafa skarað framúr í evrópskri knattspyrnu á árinu, eins og áður sagði var gefinn út listi af 40 nöfnum sem koma til greina að þessu sinni.

Grujic var keyptur til félagsins í janúar á þessu ári en spilaði áfram með Rauðu Stjörnunni frá Belgrad út tímabilið þar sem hann varð meistari með liðinu í serbnesku deildinni, með fádæma yfirburðum.  Á þessu tímabili hefur hann fengið nokkur tækifæri með aðalliðinu og spilaði sinn fyrsta leik í byrjunarliði gegn Derby County í deildarbikarnum í síðustu viku.  Hann stóð sig einnig vel á undirbúningstímabilinu og skoraði þrjú mörk.

Það eru nokkrir blaðamenn virtra blaða í Evrópu sem velja leikmenn á listann en þeir koma frá The Times á Englandi, A Bola í Portúgal, L'Equipe í Frakklandi, Bild í Þýskalandi, Marca á Spáni, Corriere dello Sport-Stadio, La Gazzetta dello Sport og Tuttosport á Ítalíu.

Fleiri leikmenn frá Englandi eru á listanum en þar má meðal annars nefna Alex Iwobi hjá Arsenal og Ruben Loftus-Cheek hjá Chelsea.