Ryan Kent lánaður

Ryan Kent hefur verið lánaður frá Liverpool til Glasgow Rangers. Þar verður hann undir leiðsögn Steven Gerrard. Áður hafði Ovie Ejaria farið í lán til Rangers og svo er Jon Flanagan þriðji leikmaðurinn sem Steven hefur fengið til sín frá Liverpool. Jon gerði fastasamning við Rangers.  

Ryan var lánaður til tveggja félaga á síðustu leiktíð. Fyrst til þýska liðsins Freiburg og svo Bristol City. Ryan náði sér ekki á strik á hvorugum staðnum. Áður var hann leiktíðirnar á undan í láni hjá Coventry City og Barnsley. Honum gekk vel hjá báðum þessum liðum. 

Ryan Kent, sem er snöggur útherji, vakti mikla athygli með Liverpool á undirbúningstímabilinu fyrir ári en náði ekki að fylgja því eftir. Hann skoraði eitt marka Liverpool í 0:7 sigri á Chester í fyrsta æfingaleiknum núna í sumar. Hann hefur leikið einn leik með aðalliði Liverpool.

Þess má geta í leiðinni að ungi markmaðurinn Shamal George hefur verið lánaður frá Liverpool til Tranmere Rovers. Hann verður hjá Tranmere þar til í janúar.