Auðveld ákvörðun

Thiago Alcântara segir að það hafi verið auðveld ákvörðun að fara til Liverpool. Hann hafi einfaldlega ekki viljað missa af því tækifæri að spila í ensku knattspyrnunni. Hann átti þess kost að fara aftur heim til Spánar en þegar Liverpool hafði samband var teningunum kastað. 


,,Ég átti möguleika á því að snúa til baka en ég það var alveg á hreinu að mig langaði að upplifa að spila í Úrvalsdeildinni því það er mjög erfið deild. Ákvörðunin var auðveld eftir að þjálfarinn og félagið settu sig í samband við mig."


Thiago hefur átt erfitt uppdráttar það sem af er í ensku knattspyrnunni. Slæm meiðsli og veikindi hafa ekki hjálpað til en þar fyrir utan virðist sem að hann hafi ekki náð taktinum í þessari erfiðu deild.  

Það er þó ekki nokkur vafi á hæfileikum Thiago. Hann vann átta titla með Barcelona og 16 með Bayern Munchen. Sumir telja þó að Liverpool hafi gert mistök með því að fá Spánverjann til sín. Tíminn leiðir það í ljós.