Þakklæti!

Í dag eru tíu ár liðin frá því Jordan Henderson skrifaði undir samning við Liverpool. Á þessum tímamótum er fyrirliða Liverpool þakklæti efst í huga. Hann segir þó að hann sé ekki alveg viss um hvernig hann á lýsa tilfinningum sínum á þessum merku tímamótum.


,,Ég er ekki alveg viss! Það er eins og tíminn hafi flogið áfram. Manni finnst að maður sé orðinn gamall en samt finnst mér að ég sé frekar ungur. Ég er þrítugur og það er ennþá mikið eftir af ferli mínum. En þessi tíu ár hafa verið ótrúleg. Ótrúleg tíu ár!"


,,Ég bara vona að framtíðin eigi eftir að bera meira í skauti sér. Enginn veit hvað gerist í framtíðinni og ég geri mér grein fyrir því að hlutirnir geta breyst hratt í knattspyrnunni. Svo veit ég vel að allt tekur enda. Ég er bara þakklátur fyrir að ég hef fengið að vera tíu ár hjá þessu knattspyrnufélagi og náð að afreka margt."


,,Ég ítreka þakklæti til allra sem hafa stutt við bakið á mér á þessari vegferð. Stuðningsmennirnir eiga þakkir skildar og það sama á við leikmennina og starfsfólkið. Allir hafa hjálpað okkur á ómetanlegan hátt og ég hef verið heppinn og lánsamur að hafa unnið með öllu þessu fólki og það hefur gert drauma að veruleika. Þetta fólk hefur með samtakamætti hjálpað mér við að láta drauma mína rætast og í raun get ég ekki þakkað því til fullnustu!"


Liverpool keypti Jordan Henderson frá Sunderland 9. júní 2011. Liverpool borgaði 20 milljónir sterlingspunda fyrir Jordan. Kenny Dalglish var framkvæmdastjóri Liverpool þegar Jordan var keyptur. Framan af töldu margir að Kenny hefði ekki metið piltinn rétt og peningunum hefði verið illa varið.


Tveimur árum eftir að Jordan kom til Liverpool gaf Brendan Rodgers, þáverandi framkvæmdastjóri Liverpool, Jordan kost á að fara til Fulham. Jordan afþakkaði tilboðið og sagðist ætla að berjast fyrir sæti sínu í liðinu. Það gerði hann svikalaust og þremur árum seinna gerði Brendan Jordan að fyrirliða þegar Steven Gerrard lagði skóna á hilluna.


Magnaður viðsnúningur á ferli Jordan. Framkvæmdastjórinn sem gaf honum kost á að fara gerði hann þremur árum seinna að fyrirliða eftir að einn besti leikmaður í sögu félagsins hætti!


Þá má segja að blómatími Jordan hafi hafist. Hann fór fyrir liðinu með góðu fordæmi. Lengi vel taldi hluti stuðningsmanna Liverpool að Jordan stæði ekki undir nafni sem fyrirliði Liverpool en nú efast enginn. Jordan hefur vaxið og dafnað sem leikmaður og fyrir utan að vera fyrirliði er hann búinn að vera lykilmaður í liðinu síðustu árin. Evrópubikarinn, Stórbikar Evrópu, Heimsbikar félagsliða og Englandsbikarinn hafa farið á loft í höndum Jordan Henderson. Hann er einfaldlega einn besti fyrirliði í sögu Liverpool!