Craig nýtur Ólympíuleikanna í botn!

Craig Bellamy nýtur Ólympíuleikanna út í ystu æsar. Hann keppir auðvitað en hann nýtur þess líka að hitta aðra íþróttamenn og svo fær hann líka tækifæri til að fara heim til Cardiff. En kynnin við aðra íþróttamenn í Ólympíuþorpinu eru áhugaverð. Craig hafði meðal annars þetta að segja á blaðamannafundi í gær.

,,Maður fer í mat, velur sér hvað maður vill borða, nær sér í disk og svo sest maður bara hjá einhverjum. Maður hittir alls konar fólk með ýmsan bakgrunn. Við höfum hitt full af bresku keppendunum og marga hnefaleikakeppendur. Ég var í hnefaleikum þegar ég var strákur og var alveg þokkalegur. Móðurfólkið mitt var mikið í hnefaleikum."

,,Um daginn var ég að spjalla við dýfingamanninn sem keppir með Tom Daley í dag. Þeir spyrja okkur alveg eins og við þá. Ég reyni að fræðast um hvað þeir borða og allt í sambandi við íþróttina þeirra. Við viljum auðvitað standa okkur vel en sumir af þessum náungum eru búnir að undirbúa sig fyrir þetta í fjögur ár. Svo gæti þetta tekið tíu sekúndur, fjórar mínútur og þá eru örlögin ráðin hjá þeim næstu fjögur árin. Þetta er gífurlegt álag og mér þykir enn vænna um starfið mitt þegar ég kynnist svona álagi af því ég er ekki undir svona miklu álagi."

Craig Bellamy hefur oft lýst því að hann spilar knattspyrnu af því hann hefur svo gaman af því. Hann veit einfaldlega ekkert skemmtilegra og titlar og metorð í knattspyrnunni skipta ekki mestu fyrir hann.

,,Nei, það magnaðasta er að spila knattspyrnu daginn út og daginn inn. Það skiptir engu hvort ég sé að spila vináttuleik. Ég er einfaldlega lánsamur að stunda þessa íþrótt. Ég nýt hvers einasta andartaks."

Á morgun mætir Craig í heimaborg sína þar sem Bretar leika úrslitaleik um áframhald á Ólympíuleikunum við Úrúgvæ á Árþúsundaleikvanginum. Craig segir það magnað að spila í Cardiff. 

,,Ég er frá Cardiff svo það verður magnað. Nú átta ég mig kannski fyrst á hversu langt ég er búinn að fara á ferlinum og hvaðan ég kem. Ég fæddist í Splott en það eru svona fimmtán mínútur þangað. Amma mín, sem ég var mikið hjá, bjó í Adamsdown sem er enn nær leikvanginum. Ég man líka eftir gamla Cardiff Arms Park leikvanginum og það er ótrúlegt að sjá aðstöðuna sem er hérna núna. Ég hef verið svo heppinn að horfa á ruðning og fara á tónleika hérna og eins hef ég leikið fyrir hönd þjóðar minnar hér. Mér finnst alltaf jafn magnað að sjá þennan leikvang. Það var mjög gaman í Manchester og mér fannst frábært að búa þar og það var líka magnað í London. En það er sannarlega vel við hæfi að spila síðasta leikinn í riðlakeppninni í Cardiff og vonandi verður það ekki síðasti leikur okkar á leikunum."

Breska liðinu dugir jafntefli við Úrúgvæ í Cardiff á morgun en tapi það fellur það líklega úr leik. Suður Ameríkumeistararnir þurfa nauðsynlega á sigri að halda svo það verður hart barist á Árþúsundaleikvanginum því Luis Suarez, Sebastian Coates og félagar ætla sér ekki heim strax. Hægt verður að horfa á leikinn á Ólympíurás Ríkisútvarpsins. Leikurinn hefst þegar klukkuna vantar stundarfjórðung í sjö annað kvöld.

Víst er að Craig Bellamy mun ekki láta sitt eftir liggja annað kvöld og hvað þá fyrst leikið er í heimaborg hans. Margir telja hann besta mann Breta hingað til en hann er búinn að skora eitt mark og leggja upp tvö!