Sitt sýnist hverjum

Luis Suarez hefur verið mikið milli tannanna á hinum og þessum síðustu vikuna. Sitt sýnist hverjum um þennan snjalla leikmann og hegðun hans á knattspyrnuvellinum. Umræðan byrjaði eftir leik Liverpool og Stoke City sem fór fram sunnudaginn fyrir viku. Eftir leikinn kom Tony Pulis, framkvæmdastjóri Stoke, fram og lét Luis heyra það fyrir endalausan leikaraskap og heimtaði að hann yrði dæmdur í leikbann. Að minnsta kosti einn leikmaður Stoke tók í sama streng eftir leikinn og fordæmdi Luis.

Luis lét sig reyndar falla í leiknum svo skömm var af en það fór lítið fyrir því í umræðunni að hann fékk heldur betur að finna fyrir því hjá leikmönnum Stoke. Í upphafi leiks tróð til að mynda Robert Huth, varnarmaður Stoke, á honum. Þjóðverjinn fékk ekki spjald og slapp við refsingu eftir leik sem hefði líklega verið hægt að viðhafa. 

Næstur til að láta Luis fá það óþvegið var Jim Boyce framámaður í Alþjóðaknattspyrnusambandinu. Hann stimplaði Luis sem svindlara og líkti leikaraskap í kanttspyrnunni við krabbamein. Reyndar var með ólíkindum að svo mikill áhrifamaður taki einn leikmann fyrir á þennan hátt. Nú síðast í dag bættist Laurent Koscielny, varnarmaður Arsenal, í flokk þeirra sem hafa fordæmt Luis fyrir leikaraskap og svindl. Vissulega má taka undir það með þeim sem fordæma leikaraskap í knattspyrnu að hann er óþolandi. Hann er það fullkomlega og þá er sama hvort Luis Suarez eða einhver annar á í hlut!

Brendan Rodgers kom sínum manni til varnar eftir leikinn gegn Stoke en fordæmdi um leið leikaraskap. Hann lagði þó áherslu að svo virtist sem aðrar reglur gildi um Luis en aðra leikmenn. Þetta var ekki í fyrsta sinn sem Brendan bendir á þetta núna í haust og reyndar eru margir sammála honum því ekki hefur nú Luis fengið mikið dæmt sér í hag á þessari leiktíð. Sumir telja að hann hafi átt að fá minnsta kosti þrjár vítaspyrnur það sem af er.  

Luis sjálfur reyndi að bera hönd fyrir höfuð sér fyrir helgina og sagði að sér væri alveg sama hvað aðrir fjösuðu um hann. Það eina sem hann hugsaði um væri að standa sig inni á knattspyrnuvellinum. Forráðamenn knattspyrnusambands Úrúgvæ létu líka til sín heyra og gagnrýndu Jim Boyce fyrir gagnrýni sína! 

Ekki má svo gleyma því að Luis Suarez fékk átta leikja leikbann, á síðustu leiktíð, fyrir ,,ósannað" kynþáttaníð þar sem hann var dæmdur eftir að hans orð þóttu ótrúverðugari en Patrice Evra leikmanns Manchester United. Enginn annar var vitni af orðaskiptum þeirra. Nú í haust fékk svo John Terry, fyrirliði Chelsea, fjögurra leikja bann, frá Enska knattspyrnusambandinu, fyrir orð sem hann lét falla í garð Anton Ferdinand leikmanns Q.P.R. Þau orð John beindust gegn litarhætti Anton og ekki vantaði vitnin í það skiptið! Reyndar var John sýknaður fyrir almennum dómstóli í sumar en knattspyrnusambandið kærði hann líka enda ekki annað hægt eftir hvernig það tók á málum Luis.

En á Luis sér viðreisnarvon hér eftir í ensku knattspyrnunni? Hann getur vissulega bætt eitt og annað í sínu fari hvað háttvísi varðar. Mörgum finnst þó að farið sé fullhart gegn honum því hann er jú ekki einn um aðfinnsluverða hegðun á knattspyrnuvellinum.

Tekið skal fram að hér er alls ekki verið að bera í bætifláka fyrir það sem Luis hefur gert og ekki verið til sóma. Sjálfum finnst mér að dæma eigi menn í svo sem tveggja leikja bann eftir á þegar þeir verða sannanlega uppvísir af leikaraskap sem ekki sést til í leik. En sitt sýnist hverjum og hver og einn verður að mynda sér skoðun í þessu öllu.