Steven stefnir í 600 leiki

Steven Gerrard mun, spili hann gegn Newcastle á sunnudaginn, leika leik númer 600 fyrir hönd Liverpool. Þetta er fágætur árangur og segir sitt um hversu magnaður leikmaður Steven er. Hann og Jamie Carragher eru langleikjahæstir af núverandi leikmönnum Liverpool en Jamie er nú búinn að spila 710 leiki. 

Ekkert nema meiðsli geta komið í veg fyrir að Steven Gerrard spili á sunnudaginn enda er hann enn lykilmaður í liði Liverpool og það skiptir ekki síst máli að hann sé til taks núna þegar leikmannahópurinn er þunnskipaðri en hann hefur verið í áraraðir. Víst er að það munar mikið um fyrirliðann og vonandi nær hann sínum 600. leik og vonandi verður sá leikur gleðilegur.