Spáð í spilin

Oldham Athletic v Liverpool

Næsta verkefni í F.A. bikarnum liggur fyrir. Liverpool þarf að fara til hólmgöngu við heimamenn í Oldham Athletic. Oldham er í þriðju deild og því heldur hærra sett en utandeildarlið Mansfield Town sem Liverpool rétt náði að slá út í síðustu umferð. Liverpool slapp í raun vel frá þeirri hólmgöngu og því ljóst að verkefni morgundagsins verður ekkert auðvelt. Óvænt úrslit hafa nú þegar átt sér stað í keppninni og leikmenn Liverpool verða að mæta einbeittir til leiks.
 

Liverpool er þó ekki að fara út í algjöra óvissu því þessi lið mættust í 3. umferð F.A. bikarins á þrettándanum í fyrra. Sá leikur fór reyndar fram á Anfield og Liverpool vann 5:1. En Oldham komst reyndar yfir og Liverpool mátta taka vel á því til að hafa betur. Þetta var skemmtilegur leikur. Hver man til dæmis ekki eftir því þegar Liverpool jafnaði þegar skot Jonjo Shelvey fór í magann á Craig Bellamy og í markið? Það er ekkert gefið í F.A. bikarnum og neðrideildarlið til alls vís þegar þeim tekst vel upp. Þetta er það skemmtilega við keppnina það er á meðan liðið sem maður heldur með lendir ekki illa í því!
 
Liverpool á tvo geysilega erfiða útileiki framundan í deildinni fyrst Arsenal í miðri viku og svo Englandsmeistara Manchester City um næstu helgi. Það er því ekki ólíklegt að Brendan Rodgers hleypi yngri leikmönnum að. Sparkspekingar reikna með því að Steven Gerrard og Luis Suarez hvíli jafnvel alveg.

Mikið vetrarríki hefur verið á Bretlandseyjum upp á síðkastið og ekki alveg víst að leikurinn geti farið fram. Heimamenn hafa þó breitt yfir völlinn til að halda honum snjólausum og þíðum. Við bætist að leikurinn fer fram í hæstu hæðum því völlurinn stendur nokkuð hátt yfir sjó.

En spáin hljóðar upp á að Liverpool fari áfram eftir þæfing og 1:2 sigur. Um leið ætla ég að spá því að Daniel Sturridge komi sér á spjöld sögunnar með því að skora í fjórða leiknum í röð en enginn leikmaður Liverpool hefur hingað til skorað í fjórum fyrstu leikjum sínum með liðinu. Jonjo Shelvey skorar líka en hann skoraði sitt fyrsta mark fyrir Liverpool gegn Oldham í fyrra. Já, mér finnst liggja í loftinu að Liverpool þurfi að hafa fyrir því enda fer liðið aldrei auðveldar leiðir!  

YNWA

Hér má sjá leikmenn Liverpool æfa í snjó og kulda fyrir leikinn.