Kóngurinn spáði öruggum sigri!

Kenny Dalglish fylgist vel með gengi Liverpool og í dag setti hann fram spá um öruggan sigur á móti Swansea á Twitter síðunni sinni.

Svona var spáin hjá Kóngnum sett fram á Twitter síðunni. ,,Þrjú núll. Swansea er að hugsa um næstu viku. Luis skorar tvö." Með því að segja að Swansea sé að hugsa um næstu viku á Kenny við að um næstu helgi leika Svanirnir til úrslita um Deildarbikarinn við Bradford City. Það kom líka á daginn að Michael Laudrup, framkvæmdastjóri Swansea, og hans menn voru með hugann á Wembley! 

Kelly Coates dóttir hans var fljót að láta karlinn heyra það og setti skilaboð á sína síðu þess efnis að hann hefði nú getað látið hana vita því hún hefði veðjað á 1:0! Hún sagðist reyndar hafa sett þá spá sína fram áður en hún vissi hvernig Michael Laudrup stillti upp liði sínu en hann hvíldi nokkra af bestu mönnum sínum. 

Það verður ekki annað sagt en að Kenny hafi hitt nokkuð vel á með spá sinni en reyndar varð sigurinn stærri en hann hugði sem var hið besta mál! Liverpool vann stórsigur 5:0 og eftir leikinn setti Kenny þessa færslu inn. ,,Hafði að minnsta kosti rétt fyrir mér með núllið! Maður á alltaf betri möguleika á sigri þegar haldið er hreinu. Njótið. Ég vona að það verði eitthvað eftir af mörkum fyrir leikinn á móti Zenit." Við vonum líka að Liverpool eigi nógu mörg mörk eftir í pokahorninu til að slá Zenit úr leik í Evrópudeildinni á fimmtudagskvöldið.

Hér má skoða Twitter síðu Kenny Dalglish.