Rafa sýndur stuðningur í Wigan!

Stuðningsmenn Liverpool höfðu yfir mörgu að gleðjast í Wigan enda vann liðið þeirra stórsigur þar. Rafael Benítez fékk líka eftirminnilegan stuðning frá stuðningsmönnum gamla liðsins síns.

Þegar um 20 mínútur voru eftir hófu stuðningsmenn Liverpool að syngja nafn Rafa af miklum krafti líkt og þegar hann var framkvæmdastjóri Liverpool. Það fór ekkert á milli mála hver var hylltur og af hverju. Jú, flest spjót hafa staðið á Rafa eftir að hann tók við Chelsea og ekki minnkaði atgangurinn þegar hann, í síðustu viku, bað stuðningmenn Chelsea frekar að styðja liðið sitt en að eyða orku í að úthúða sér. Það var reyndar heiðarlega gert hjá honum að mér fannst. En það var magnað að heyra stuðningsmenn Liverpool sýna Rafa stuðning með sínum hætti á laugardaginn! 

En stuðningsmenn gleyma ekki sínum mönnum og Rafael Benítez er ekki gleymdur hjá stuðningsmönnum Rauða hersins enda skilaði hann mögnuðu starfi og titlum fyrir þá! Það mátti líka heyra stuðningsmenn Liverpool kalla ,,Dalglish" líkt og á næstum hverjum leik og eins var nafn Brendan Rodgers kyrjað! 

Hér má sjá og heyra stuðningsmenn Liverpool syngja nafn Rafael Benítez í Wigan. Reyndar heyrðist söngur þeirra betur í sjónvarpsútsendingunni.

Þess má til gamans geta að 0:4 sigur Liverpool í Wigan var sá fyrsti sem liðið vinnur þar frá því á valdadögum Rafael Benítez. Liverpool vann var síðast árið 2007!