Bara byrjunin!

Brasilíski strákurinn Philippe Coutinho hefur byrjað stórvel hjá Liverpool. Hann var mjög góður á móti Wigan og lagði upp tvö af fjórum mörkum Liverpool í 0:4 sigri. Hann opnaði svo markareikning sinn á móti Swansea þegar Liverpool vann 5:0. Brendan Rodgers segir þó að þetta sé bara byrjunin og sá brasilíski eigi eftir að verða betri og betri.  

,,Hann hefur aðlagast vel og fallið mjög vel inn í allt. Hann er ungur leikmaður sem býr yfir miklum hæfileikum og hefur yndislega tækni. Hann hefur góðan leikskilning og skilur hvað hann á að gera og hvernig hann á að spila. Hann lagði upp tvö mörk á móti Wigan og var virkilega góður."

,,Hann er enn að ná upp úthaldi og núna getur hann spilað í 65 til 70 mínútur en hann er að styrkjast með hverjum degi sem líður. Það sem af er virðist sem að við höfum gert mjög góð kaup í honum."

Philippe hefur enn einungis leikið þrjá leiki með Liverpool frá því hann kom frá Inter Milan en það er ekki neinn vafi á því að pilturinn býr yfir miklum hæfileikum. Það er vonandi að hann eigi eftir að blómstra hjá Liverpool því félagið hefur ekki efni á að kaupa menn sem ekki standa sig!