Spáð í spilin

Liverpool liðið hefur verið á góðri siglingu undanfarið og hefur ekki tapað leik í deildinni síðan 11. febrúar þegar WBA vann nokkuð ósanngjarnan 2-0 sigur á Anfield. Liðið er nú í 6. sæti með 45 stig, aðeins 7 stigum frá Chelsea í 4. sætinu og 2 stigum á eftir Arsenal sem er í 5. sæti. Að vísu á Arsenal leik til góða.

Það er ekki annað að sjá en að liðið sé loks að ná vopnum sínum undir stjórn Brendan Rodgers, en byrjunin á tímabilinu var vægast sagt dapurleg eins og við vitum öll. Að minnsta kosti uppskeran. Ef litið er á gengi liðsins í deildinni frá því í lok nóvember sést að aðeins Manchester United og Tottenham geta státað af betri árangri en okkar menn.

Það er því margt jákvætt í spilunum hjá Liverpool en það sem ég hef áhyggjur af er eilíft blaður leikmanna um að liðið geti enn náð 4. sætinu. Það kvak hefur ævinlega farið af stað eftir sigurleiki og oftar en ekki er eins og leikmenn nái ekki að höndla pressuna sem þeir setja á sig.

Þessvegna hefði ég hreinlega kosið að Brendan bannaði mönnum að ræða 4.sætið við fjölmiðla. En því er ekki að heilsa. Nú er hann sjálfur farinn að gæla við það í fjölmiðlum. Lét hafa það eftir sér í vikunni að Chelsea og Arsenal væru eflaust farinn að finna hvernig Liverpool væri farið að anda ofan í hálsmálið á þeim. Ég skal ekki segja. Kannski gengur þessi sálfræðihernaður upp hjá Rodgers, en einhvernveginn hefur mér fundist okkar lið ansi slappt í slíkum hernaði, allt frá að Benítez reyndi að etja kappi við Ferguson á sínum tíma.