Spáð í spilin

Nú er aðeins tæp klukkustund í leik Liverpool og West Ham á Anfield og því er ekki úr vegi að spá örlítið í spilin !


Okkar menn í Liverpool eru í 7. sæti deildarinnar og geta, með sigri, jafnað erkifjendurna í Everton að stigum í deildinni, að minnsta kosti um stund en þeir bláu eiga leik aðeins á eftir Liverpool í dag.

West Ham sitja í 12. sæti deildarinnar með 36 stig eru ekki alveg lausir við falldrauginn.  Þeir hafa þó staðið sig ágætlega á tímabilinu og, eins og við var að búast, gert betur á heimavelli sínum heldur en á útivelli.

Bæði lið unnu góða sigra um síðustu helgi, Liverpool sóttu 3 stig til Birmingham eftir 1-2 sigur á Aston Villa á meðan West Ham unnu góðan sigur á West Bromwich Albion heima 3-1.  Þar skoraði reyndar lánsmaðurinn Andy Carroll tvö marka Hamranna en auðvitað má hann ekki spila gegn Liverpool í dag.


Fyrri leikur liðanna á tímabilinu var mikill markaleikur sem endaði með 2-3 sigri gestanna.  Liverpool léku án Luis Suarez sem var í leikbanni og því bjuggust ekki margir við því að Liverpool myndu skora heil þrjú mörk án hans !  En þeir Glen Johnson, Joe Cole og Jonjo Shelvey skoruðu mörk liðsins, en eins og margir muna komust heimamenn í 2-1 í seinni hálfleik en okkar menn sneru taflinu við.

Ef litið er lengra aftur í tíma til að skoða viðureignir liðanna má sjá að okkar menn hafa yfirhöndina.  Í síðustu sex leikjum liðanna á Anfield hefur Liverpool unnið 5 þeirra og einn endað með jafntefli.  Heilt yfir hafa West Ham aðeins unnið einn leik af síðustu sex heima og heiman.


Síðast mættust liðin á Anfield 20. nóvember 2010 og endaði leikurinn 3-0 þar sem Glen Johnson, Dirk Kuyt (víti) og Maxi Rodriguez skoruðu mörkin.  Í raun hafa West Ham menn ekki unnið á Anfield síðan 14. september 1963 !  Sagan ætti því að vera með okkar mönnum í dag þó svo það hljóti nú að styttast í að West Ham uppskeri sigur á Anfield.

Af núverandi leikmönnum félagsins er það Steven Gerrard sem er markahæstur gegn West Ham en hann hefur skorað 7 mörk í 19 leikjum gegn þeim.  Það er hinsvegar John Toshack sem hefur skorað mest gegn þeim eða alls 10 mörk í 10 leikjum !  Ekki er ólíklegt að Michael Owen hefði slegið það met ef hann hefði verið áfram hjá félaginu en hann skoraði 7 mörk í 9 leikjum.

En þá er rétt að snúa sér að leik dagsins.  Eins og áður hefur komið fram þá má Andy Carroll að sjálfsögðu ekki spila þennan leik þar sem hann er á láni.  Þegar þetta er skrifað eru byrjunarliðin komin og okkar menn eru með óbreytt lið frá því í sigrinum á Aston Villa.  Ein breyting er á varamannabekknum en Raheem Sterling er smávægilega meiddur og í hans stað kemur Oussama Assaidi.

Gestirnir gera tvær breytingar, þeir Carlton Cole og James Tomkins koma inní byrjunarliðið.

Fyrir leikinn verður mínútu þögn til minningar um fórnarlömb Hillsboro slyssins eins og venja er fyrir síðasta heimaleik sem fer fram fyrir 15. apríl.  West Ham munu einnig leggja blómsveig að minnismerkinu á Anfield.

Að lokum er það bara spáin sjálf.  Undirritaður spáir heimasigri og verða lokatölur 2-0 !