Jay Spearing með þrennu í tapi varaliðsins

Jay Spearing átti stórleik og skoraði þrennu þegar varalið Liverpool tapaði 3-4 fyrir varaliði Bolton í kvöld. Liverpool-liðið komst þrisvar yfir í leiknum en Bolton skoraði sigurmarkið á lokamínútum leiksins. Liverpool, sem varð varaliðsmeistari á síðustu leiktíð, er því enn í neðsta sæti í norðurhluta varaliðsdeildarinnar þegar tveir leikir eru eftir. Tvö stig eru í næsta lið fyrir ofan. Guðlaugur Victor Pálsson lék allan leikinn með Liverpool og átti þátt í einu markanna.

Spearing skoraði fyrsta mark leiksins eftir þrjár mínútur þegar hann renndi boltanum yfirvegað í mark Bolton. Í kjölfarið fékk Liverpool nokkur góð færi til að auka forskotið og það var því gegn gangi leiksins þegar Bolton jafnaði eftir korters leik. Það gerði Ariza Makukula eftir að hafa komist inn í slæma sendingu frá Stephen Darby.

Enn óðu leikmenn Liverpool í færum og Godwin Antwi, Andras Simon og Dani Pacheco komust allir nálægt því að skora áður en Spearing bætti sínu öðru marki við eftir 26 mínútur með föstu skoti í hornið niðri eftir undirbúninh Pacheco, Kristian Nemeth og Guðlaugs Victors Pálssonar. Skömmu síðar fékk Kristian Nemeth dauðafæri eftir frábæra sendingu frá Spearing en var of lengi að athafna sig og færið fór forgörðum.

Bolton jafnaði skömmu fyrir leikhlé með skalla eftir hornspyrnu en Liverpool hafði komist aftur yfir áður en flautað var við leikhlés. Darby átti þá góðan sprett upp vinstri kantinn og sendi á Nemeth sem var felldur í teignum. Vítaspyrna var dæmd og Spearing skoraði úr henni og fullkomnaði þar með þrennuna.
  
Í seinni hálfleik hélt sókn Liverpool áfram og Andras Simon fékk tvö ágæt færi. Síðan þurfti Spearing að bregða sér í hlutverk varnarmanns og hreinsa af marklínu eftir að Ebi Smolarek hafði komist fram hjá markverðinum Martin Hansen, eftir skógarferð þess síðarnefnda. Bolton náði hins vegar að jafna í þriðja sinn á 65. mínútu. Það kom upp úr mikilli þvögu í teignum þar sem Makukula skaut í stöng og náði svo að ýta frákastinu inn fyrir línuna. Makukula tryggði svo Bolton sigur með sínu þriðja marki eftir misskilning í vörn Liverpool. Tapið þýðir að Englandsmeistaralið Liverpool er enn í neðsta sæti í deildinni og liðið hefur nú aðeins tvo leiki til að bjarga sér úr þeirri stöðu.

Liverpool: Marin Hansen, Emmanuel Gomis Mendy, Stephen Darby, Mikel San Jose Dominguez, Godwin Antwi, Guðlaugur Victor Pálsson, Jay Spearing, Daniel Pacheco, Krisztian Nemeth (Ryan Crowther 65), Andras Simon (Vitor Flora 82), Gerardo Bruna (Gary Mackay-Steven 72). Ónotaðir varamenn: Dean Bouzanis, Robbie Threlfall.

Maður leiksins samkvæmt Liverpoolfc.tv: Jay Spearing. Átti einfaldlega framúrskarandi leik.