Ryan Babel má fara ef hann vill

Líklegt er talið að Ryan Babel verði seldur í sumar ef marka má fréttir frá Liverpoolborg.  Babel vill fá staðfestingu á því að hann muni spila meira á næsta tímabili en Rafael Benítez er ekki tilbúinn til að gera það.

Umboðsmaður Babel, Winnie Haatrecht hitti Benítez til þess að ræða mál leikmannsins og þá hvort hann muni vera meira inní myndinni á næsta tímabili.  Benítez gat ekki staðfest neitt slíkt við umboðsmanninn og á að hafa sagt við Babel að hann megi nú ræða við þau félög sem gera tilboð í hann í félagaskiptaglugganum í sumar.

Líklegt er að nokkur félög renni hýru auga til Babel en hann var keyptur á 11.5 milljónir punda árið 2007.  Benítez mun líklega þurfa að sætta sig við að selja Babel fyrir aðeins minni upphæð og er rætt um 8 milljónir punda í því samhengi.

Ajax, fyrrum félag Babel, skipti um þjálfara í gær er Martin Jol tók við stjórnartaumunum og hafa þeir sýnt áhuga á því að fá hann aftur til liðs við sig, þó er líklegt að verðmiðinn sé of hár fyrir hollenska félagið.

Nokkur lið frá Ítalíu og Spáni hafa líka áhuga og gæti Benítez þá notað Babel sem skiptimynt fyrir kaup á öðrum leikmönnum.  Tottenham, Aston Villa og Arsenal gætu líka haft áhuga og þá gæti jafnvel verið að Babel færi til Villa í skiptum fyrir Gareth Barry.

Babel hefur skorað 14 mörk í 91 leik fyrir félagið.  Hann hefur hinsvegar aðeins byrjað inná í 42 af þessum leikjum, byrjaði aðeins inná í sex leikjum í Úrvalsdeildinni á þessu ári og spilaði hann heilar 90 mínútur aðeins 15 sinnum.

Benítez þarf væntanlega að selja einhverja leikmenn til að geta keypt í sumar og vill hann ólmur losna við þá leikmenn sem ekki eru lengur í plönum sínum.  Benítez sagði þetta í viðtali nýverið:  ,,Við erum með nokkra leikmenn í sigtinu en það er of snemmt að segja neitt ennþá því mörg félög vita ekki hvað framtíðin ber í skauti sér og við munum bíða og sjá."

,,En okkar hugmynd er að vera búnir að ganga frá kaupunum á öllum leikmönnum áður en undirbúningstímabilið hefst vegna þess að það væri fullkomið.  Það þýðir að við getum unnið með þeim frá degi númer eitt.  Þannig er hægt að segja þeim frá þeim hugmyndum sem við höfum og þeir geta þá farið að æfa samkvæmt því."