Lee ánægður með endurkomu Aurelio

Sammy Lee er ánægður með að Fabio Aurelio sé tilbúinn í slaginn á ný en Brasilíumaðurinn meiddist í sumar þegar hann var að leika við son sinn.

Aurelio er kominn aftur til æfinga á Melwood og ekki er ólíklegt að hann spili gegn Burnley á laugardaginn kemur.  Með endurkomu hans eykst samkeppnin um stöðu vinstri bakvarðar enn frekar en Emiliano Insua hefur verið valinn framyfir Andrea Dossena það sem af er tímabilinu.

,,Fabio verður líkt og nýkeyptur leikmaður fyrir okkur," sagði Lee.  ,,Hann var ekki tiltækur á undirbúningstímabilinu en hann er að koma til baka og vonandi mun hann berjast um stöðu vinstri bakvarðar sem fyrst.  Allir vilja hafa sína leikmenn ómeidda en það kallar aftur á vandamál því þá þarf að velja lið og skilja einhverja útundan.  En við viljum frekar eiga við það vandamál að stríða heldur en að þurfa að kljást við meiðsli leikmanna."

,,Rafa hefur margoft sagt að hann hefur fulla trú á þessum hóp og okkur finnst við geta gert atlögu að titli í öllum keppnum sem við tökum þátt í."

Lee varði einnig kaupin á Glen Johnson en mörgum fannst ansi mikið að borga 17 milljónir punda fyrir hægri bakvörð í sumar.  Johnson hefur spilað frábærlega það sem af er tímabili en hann var engu að síður gagnrýndur fyrir frammistöðu sína með Englandi gegn Slóveníu á laugardaginn.

,,Glen er gæðaleikmaður í gæðaliði og ég held að hann hafi bætt lið okkar," bætti Lee við.  ,,Það sem við reynum hverju sinni er að bæta gæði leikmannahópsins og okkur finnst við hafa náð því með kaupunum á Glen."

,,Hann hefur hlustað á ráðleggingar og lært.  Fyrir leikmann sem er fastamaður í enska landsliðinu þá er það ansi gott og vonandi heldur það áfram."