Hodgson líst vel á Aquilani

Alberto Aquilani hefur sýnt góða takta á undirbúningstímabilinu og Roy Hodgson vonast til þess að Ítalinn sé ekki lengur plagaður af meiðslum.

Aquilani var keyptur á u.þ.b. 17 milljónir punda fyrir síðasta keppnistímabil, eftir að Xabi Alonso var seldur til Real Madrid. Miklar væntingar voru gerðar til Ítalans, en hann var meiddur þegar hann kom til félagsins og meiddist nánast um leið og hann komst á ról. Aðdáendur Liverpool sáu hann því fyrst í leik í lok október á síðustu leiktíð.

Hann var í talsverðum meiðslavandræðum allt síðasta tímabil og fékk lítið að spila af þeim sökum. Hann hefur nú tekið fullan þátt í undirbúningstímabilinu með Liverpool og svo virðist sem meiðslin sem hrjáðu hann meira og minna allt síðasta tímabil séu loks úr sögunni.

,,Alberto hefur unnið mjög ötullega með læknum og sjúkraþjálfurum félagsins og okkur sýnist að hann sé kominn í gott stand. Hann hefur sýnt mjög góða takta á æfingum og mér líst vel á það sem ég hef séð til hans. Ég vona að meiðslin séu loks úr sögunni", segir Roy Hodgson.

,,Alberto hefur verið mjög frískur og ég vona að hann sé kominn á beinu brautina. Það sem ég hef séð til hans síðustu þrjár vikur hefur verið mjög gott og gefur góðar vonir um það sem koma skal á næstu leiktíð."