Babel vill vinna til verðlauna

Ryan Babel segist vilja komast í hóp þeirra leikmanna Liverpool sem unnið hafa til verðlauna hjá félaginu.  Enginn titill hefur komið í hús hjá félaginu síðan árið 2006 og Babel vill ólmur enda þessa bið.

Hollendingurinn kom til félagsins sumarið 2007 og er hann bjartsýnn á að leikmennirnir geti unnið til verðlauna á tímabilinu.  Hann vill þó ekki spá neinu um hvaða titil félagið mun vinna á tímabilinu en hann hefur fulla trú á því að Roy Hodgson geti stýrt liðinu til sigurs svo lengi sem mikil meiðsli hrjá ekki lykilmenn.

,,Ég er ekki mikið fyrir það að segja hversu langt við förum í þessum keppnum, en ég er viss um að ef allir haldast heilir þá eigum við góða möguleika á því að berjast á toppnum í deildinni við okkar helstu keppinauta," sagði Babel í viðtali við opinbera heimasíðu félagsins.

,,Við skulum reyna að passa uppá það að lykilmenn haldist heilir og að hópurinn verði sterkur.  Allir leikmenn teljast vera heppnir ef þeir vinna til verðlauna hjá Liverpool, og það sama gildir um mig.  Ég hef verið hér í nokkur ár og hef ekki unnið neitt ennþá.  Ég held að það sé kominn tími til að vinna til verðlauna."

Næsti leikur liðsins er við Birmingham á útivelli á sunnudag.  Birmingham eru með fimm stig í deildinni á meðan Liverpool eru með fjögur og því er ljóst að erfiður leikur er fyrir höndum.  Babel hefur oft verið orðaður við Birmingham undanfarna mánuði og virðist hann þekkja félagið mjög vel.

,,Ég býst við opnum leik vegna þess að Birmingham eru að standa sig mjög vel," sagði Babel.  ,,Þeir eru lið sem við verðum að passa okkur á - þeir vilja sækja og spila góðan fótbolta.  Þeir eru erfiðir mótherjar þannig að ég býst við leik þar sem mikið verður af færum."

,,Mér finnst McLeish vera mjög góður stjóri og ég held að hann setji leikmenn sína í réttar stöður.  Þeir hafa einnig keypt eitthvað af nýjum mönnum og eru með eiganda sem vill breyta hlutunum hjá félaginu, þannig að þeir eru klárlega með lið sem allir þurfa að vara sig á."

,,En við höfum ekki efni á því að tapa mikið af stigum.  Við þurfum að passa uppá að við fylgjum öðrum liðum á toppnum.  Það er mjög mikilvægt."

Mikið var rætt um, áður en lokað var fyrir félagskipti um daginn, að Ryan Babel myndi verða seldur. Svo varð ekki og Ryan er enn leikmaður Liverpool. Hann hefur í raun ekki enn sýnt hjá Liverpool hvað margir telja að búi í honum. Núna á þessari leiktíð  vonast, þeir sem hafa trú á honum, til að hann fái að spila sem sóknarmaður. Sú staða gæti verið hans besta en Rafael Benítez notað hann aðallega sem kantmann. Ryan hefur skorað eitt mark hingað til á þessu keppnistímabili og vonandi verða þau fleiri.