Ryan Babel lemstraður

Ryan Babel er lemstraður eftir að hafa fengið að liðka sig í vináttuleik með varaliðinu í gær. Liverpool lék gegn Huddersfield Town á útivelli og tapaði 2:1. Nathan Eccleston kom Liverpool yfir en heimamenn svöruðu með tveimur mörkum. Þetta var þriðja markið sem Nathan skorar á einni viku en hann skoraði tvívegis þegar varaliðið gerði 3:3 jafntefli við Blackburn. 

Ryan Babel fór af velli þegar stundarfjórðungur var eftir. Einn leikmanna Hudderfield féll þá ofan á Ryan og hann meiddist á síðu en er þó ekki brotinn eða brákaður. Hollendingurinn er ekki mjög illa haldinn og ætti að geta verið til taks um helgina hafi Roy Hodgson áhuga á að nota hann gegn Bolton.

Ryan, sem hefði getað skorað eins og þrjú mörk í leiknum í gær, hefur ekki náð sér á strik það sem af er leiktíðar frekar en á þeirri síðustu. Hann hefur skorað eitt mark en það var þegar hann tryggði Liverpool 1:0 sigur gegn Trabzonspor. Að öðru hefur hann ekki látið mikið meira að sér kveða.

Það stóð til að Ryan Babel færi frá Liverpool áður en lokað var fyrir félagskipti síðast og bæði Tottenham Hotspur og West Ham United höfðu áhuga á honum. Margir telja að Ryan muni yfirgefa Liverpool í janúar en vonandi nær hann að nýtast liðinu eitthvað áður en hann fer hvenær sem sem það svo verður.