Meireles valinn Leikmaður ársins

Raul Meireles var í dag útnefndur sem Leikmaður ársins af stuðningsmönnum fyrir tímabilið 2010-2011.  Fyrirkomulagið á þessum verðlaunum er þannig að Samtök atvinnumanna í knattspyrnu á Englandi tilnefna nokkra leikmenn til verðlaunanna og stuðningsmenn hvaðanæva að af landinu kjósa svo í vefkosningu.

Verður þetta að teljast nokkuð mikil viðurkenning fyrir Meireles þar sem hann er að spila sitt fyrsta tímabil í ensku Úrvalsdeildinni.  Meireles hefur komið sterkur inní lið Liverpool, spilað 37 leiki og skorað í þeim fimm mörk.  Öll mörkin hans hafa komið eftir að Kenny Dalglish tók við sem knattspyrnustjóri og sagði hann af þessu tilefni:

,,Raul hefur alltaf haft þessa eiginleika sem hann hefur sýnt svo vel undanfarið.  Kannski hefur hann aðlagast betur og sjálfstraust hans eykst þegar hann spilar vel.  Það hefur hinsvegar ekki verið um neinar stórar taktískar breytingar að ræða varðandi bættan leik hans."

,,Það er frábært að sjá Raul standa sig svona vel.  Hann hefur alltaf verið hæfileikaríkur knattspyrnumaður, hann hefur alltaf búið yfir því sem við sjáum hann gera nú fyrir Liverpool."

Þess má geta að síðasti leikmaður Liverpool til að vinna til þessara verðlauna var Steven Gerrard en hann var útnefndur árið 2009.  Það sama gerðist einnig árið 2001.  Í fyrra varð Wayne Rooney fyrir valinu.

Á dögunum var tilkynnt að Gareth Bale, leikmaður Tottenham, hefði verið kjörinn Leikmaður ársins í kjöri leikmanna sjálfra en sömu samtök sjá um það val og þetta sem Raul var kjörinn í. Jack Wilshere, sem leikur með Arsenal, var kosinn Efnilegasti leikmaður ársins.