Sér ekki eftir að hafa farið!

Fernando Torres segist ekki sjá eftir því að hafa farið frá Liverpool og gengið til liðs við Chelsea. Honum gekk hræðilega þar og skoraði aðeins eitt einasta mark. Hann skoraði þó níu mörk fyrir Liverpool áður en hann flutti til London.

,,Mér fannst síðasta keppnistímabil það versta frá því ég kom til Englands. Meiðslin sem ég varð fyrir í lok Heimsmeistarakeppninnar höfðu neikvæð áhrif á hvernig ég spilaði og allt varð erfiðara en ég hef áður lent í á ferli mínum."

,,Mér finnst tólf mörk í heildina á einu keppnistímabili ekkert. Aldrei á leiktíðinni spilaði ég af fullum krafti. Hvorki fyrir Liverpool né Chelsea. Þess vegna vil ég frekar gleyma því sem gerðist. En ég sé ekki eftir að hafa samið við Chelsea. Ég er viss um að þegar Chelsea vélin nær réttum takti verður erfitt að vinna okkur."
 
Fernando Torres segist hafa skorað tólf mörk á keppnistímabilinu og telur líklega landsliðmörk með í þeirri tölu. Að minnsta kosti skoraði hann níu mörk fyrir Liverpool og eitt fyrir Chelsea eins og áður kom fram. 

Nú er að sjá hvernig Liverpool og Chelsea vegnar á næsta keppnistímabili. Hver veit nema Fernando Torres eigi eftir að sjá eftir því að hafa farið frá Liverpool áður en yfir lýkur.