Viljum gera vel!

Fyrir ári mátti Liverpool þola ein verstu úrslit í sögu félagins þegar liðið féll úr leik í Deildarbikarnum eftir tap í vítaspyrnukeppni fyrir Northampton á Anfield Road. Í kvöld mætir Liverpool Exeter City á útivelli í þessari sömu keppni. Kenny Dalglish vill gera betur í keppninni núna.

,,Við fórum illa út úr leiknum gegn Northampton í fyrra og það á heimavelli. Við munum gera okkar besta til að koma í veg fyrir svoleiðis úrslit aftur. Við viljum standa okkur sem best í þessari keppni og þó svo að liðinu verði eitthvað breytt þá vænti ég þess að við sýnum sama hugarfar og á Emirates á laugardaginn."

Viðbúið er að Kenny breyti liði sínu eitthvað frá því á laugardaginn og nýir menn munu örugglega fá að spreyta sig gegn Exeter á St James Park.

,,Það fá einhverjir tækifæri á að spreyta sig. Menn hafa æft vel, sýnt gott hugarfar og staðfestu og eiga skilið að spila. Fyrir ári voru mikil vonbrigði hérna því liðið hafði ekki byrjað ýkja vel. Sem betur fer er staðan betri núna. En við munum ekki gleyma okkar heldur halda okkur á jörðinni og gefa okkur tíma. Strákarnir voru frábærir í útileiknum gegn Arsenal á laugardaginn en við höldum ekki að allt sér komið í lag eftir ein góð úrslit. Allir ættu að halda ró sinni."

Vonandi ná leikmenn Kenny Dalglish að sýna rétt hugarfar í kvöld þannig að ekki fari allt á versta veg líkt og gerðist hjá þeim mönnum sem Roy Hodgson valdi til leiks gegn Northampton í fyrra. Margir báru ekki sitt barr eftir hrakfarirnar í þeim leik.