Alberto Aquilani til AC Milan?

Ítalska blaðið Gazzetta greinir frá því í dag að Liverpool og AC Milan hafi náð samkomulagi um að Alberto Aquilani verði á lánssamningi hjá Milan á næstu leiktíð.

La Gazzetta dello Sport, eins og blaðið heitir raunar fullu nafni, fullyrðir að félögin hafi náð samkomulagi um lán með möguleika á sölu. Samkvæmt frétt blaðsins er Aquilani í þessum töluðu orðum á leið til Ítalíu þar sem hann mun fara í læknisskoðun hjá AC Milan í fyrramálið.

Í frétt blaðsins segir að Milan hafi skuldbundið sig til að kaupa hinn 27 ára gamla Ítala fyrir 6 milljónir evra ef hann spilar fleiri en 25 leiki fyrir félagið á tímabilinu. Það er talsvert lægri upphæð en Liverpool greiddi fyrir Aquilani.

Milannews.it segir að samkomulagið sé í höfn og Aquilani hafi nú þegar fengið úthlutað búningi númer 14 hjá Milan. Þess ber að geta að fréttir um lán hafa enn ekki verið staðfestar af hálfu félaganna sjálfra.