Robbie Fowler fer um víðan völl

Robbie Fowler hefur alltaf eitthvað skemmtilegt að segja. Hér er viðtal við kappann þar sem sem hann fer um víðan völl innan vallar sem utan.

Hver er mesta eftirsjá þín á knattspyrnuferlinum?
 
Að ná ekki að vinna Úrvalsdeildina. Allir leikmenn vilja vinna hana. Úrvalsdeildin er mesta keppni félagsliða og það myndi vera mikill heiður að vinna hana. Því miður náði ég aldrei að gera það sem leikmaður. En ég á ennþá möguleika á því sem framkvæmdastjóri. Það var alveg ömurlegt að ná ekki að vinnna hana sem leikmaður. Maður er alltaf dæmdur á því hvað maður afrekar í deildinni og hvort maður vinnur hana. Því miður tókst mér það ekki.

Hvað um Brendan Rodgers?

Hann er að gera góða hluti miðað við þá leikmenn sem hann hefur yfir að ráða. Allir hjá félaginu þurfa tíma og svo lengi sem hann fær tíma og þolinmæði á allt eftir að vera í lagi. Það þarf svolítinn stöðugleika og ég held að hann sé maðurinn sem Liverpool þarf.

Hvað ertu að fást við nú þegar leikferlinum er lokið?

Fasteignaviðskiptin ganga vel og svo er ég aðeins að vinna í sjónvarpi. En ég hef svo sem ekki hætt opinberlega. Ég ætla ekki að koma og segjast endilega vanta lið. Ég veit að ég á ekki eftir að spila aftur í Úrvalsdeildinni en ég get ennþá spilað því ég er í nógu góðu líkamlegu formi.

Hefurðu áhuga á að verða framkvæmdastjóri?

Já. Ég er byrjaður að feta mig áfram á þeirri braut. Ég var spilandi framkvæmdastjóri hjá Muangthong United í Tælandi á síðustu leiktíð. Maður getur ekki spilað endalaust og næsta skref hjá mér er að fara út í þjálfun og framkvæmdastjórn. Ég elska þessa íþrótt og þess vegna langar mig til að þjálfa og stjórna sem framkvæmdastjóri. Ég veit að maður getur ekki byrjað sem stjóri í Úrvalsdeildinni einn, tveir og þrír en ég stefni á það. Ég er búinn með B prófið og ætla mér að klára hin sem eftir eru.

Hvað þarf að gerast hjá Liverpool til að liðið fari aftur að njóta velgengni?

Það er nokkrir mjög góðir leikmenn hjá félaginu en það vantar sjálfstraust. Framkvæmdastjórinn segir það rétta og hann er að gera rétt í sínu starfi. Leikmannahópurinn er þunnskipaður og það þarf að kaupa leikmenn til að gera leikmannahópinn betri og efla samkeppni í honum. Samkeppni stuðlar að því að leikmennirnir sem fyrir eru leika enn betur. Liverpool er ekki að spila illa. Það hefur ekki gengið nógu vel að skora en ég er viss um að Brendan er að gera góða hluti og hann á eftir að halda áfram á sömu braut. Hann er rétti framvkæmdastjórinn til að gera liðið betra.

Hver var besti leikmaður sem þú spilaðir með?

Ég lék með fjölmörgum frábærum leikmönnum. Paul Gascoigne var frábær og ég gæti tekið allan daginn í að tala um þá leikmenn Liverpool sem ég hef mætur á. Nefna mætti John Barnes, Ian Rush, Jan Molby, Ronnie Whelan og Steven Gerrard sem er ótrúlegur leikmaður. Hann yrði þó trúlega í öðru sæti hjá mér. Steve McManaman var sá besti. Hann var stórfenglegur.

Hver var erfiðasti mótherjinn?

Ég hef verið lánsamur að standa mig vel á móti flestum liðum og varnarmönnum. En líklega voru þeir Steve Bruce og Gary Pallister, miðverðir Manchester United erfiðastir. Mér tókst að skora á móti þeim en þeir voru frábærir leikmenn og maður vissi að það var eriðfur leikur framundan þegar maður þurfti að mæta þeim.

Hver var hápunktur ferils þíns?

Knattspyrnumenn eru alltaf ánægðir þegar þeir vinna titla. Hápunkturinn yrði því keppnistímabilið 2000/01 þegar Liverpool vann fimm bikara og tryggði sér sæti í Meistaradeildinni. Það er líka ofarlega á blaði þegar ég skoraði sneggstu þrennu í sögu Úrvalsdeildarinnar á móti Arsenal 1994.

Hver voru mestu vonbrigðin?

Úrslitaleikur F.A. bikarsins 1996. Það er aldrei gaman að tapa fyrir Manchester United en að tapa fyrir þeim í bikarúrslitaleik er það allra versta.

Áttu ennþá hvítu jakkafötin sem leikmenn voru í fyrir F.A. bikarúrslitaleikinn 1996 á móti Manchester United?  

Já, ég á þau ennþá og ég ætla að lána þau til Þjóðarknattspyrnusafnsins í Manchester. Þar á að setja upp sýningu um tísku í knattspyrnuheiminum.

Hvaða íþróttahetjum myndir þú bjóða í mat?

Ég fylgist vel með golfi og kappreiðum. Það yrði því gaman að bjóða Tony McCoy því hann er fínasti náungi. Tiger Woods og Rory McIlroy eru líka í miklu uppáhaldi. Þetta yrði aldeilis fín þrenning.

Ertu á Twitter og er eitthvað vit í því?

Auðvitað. Ég er skráður sem @Robbie9Fowler og mér finnst gaman að nota þetta. Það eru sumir þarna sem eru að stríða mér en ég svara bara fyrir mig. Það er gott fyrir fólk sem er á opinberum vettvangi að geta komið skoðunum sínum á framfæri og eiga skoðanaskipti við stuðningsmennina. Maður þarf þó að hafa þykkan skráp!