Góður sigur á Villa Park

Liverpool gerði góða ferð til Birmingham í dag og lagði Aston Villa nokkuð sannfærandi 1-0. Daniel Sturridge skoraði mark okkar manna.

Brendan Rodgers stillti upp sama byrjunarliði og gegn Stoke um síðustu helgi. Eina breytingin á 18 manna hópnum var raunar sú að að nýliðinn Aly Cissokho kom inn í hópinn fyrir Jordan Ibe. 

Leikurinn byrjaði með nokkrum látum en eftir 10-15 mínútna leik róuðu bæði lið sig aðeins niður og það hægðist dálítið á leiknum.

Bæði lið áttu nokkur hálffæri á fyrstu mínútunum en það var Liverpool sem náði að brjóta ísinn með fyrsta, og reyndar eina marki leiksins. Það kom á 21. mínútu og var ansi laglegt. Jose Enrique sendi boltann þá á Coutinho við vítateigslínuna. Brassinn lét boltann fara og Daniel Sturridge tók við honum og þrumaði honum í þaknetið eftir að hafa farið illa með Brad Guzan í marki Villa. Staðan orðin 1-0 fyrir gestina í Birmingham.

Það sem eftir lifði hálfleiksins var Liverpool betra liðið á vellinum án þess kannski að skapa sér stórkostleg færi. En þrátt fyrir nokkra yfirburði mátti reyndar ekki miklu muna að heimamenn jöfnuðu leikinn á 42. mínútu þegar Christian Benteke, sem var iðinn við kolann gegn Liverpool á síðustu leiktíð, komst í ákjósanlegt færi. Simon Mignolet sá sem betur fer við landa sínum og okkar menn sluppu með skrekkinn. 

Síðustu mínútur hálfleiksins voru heimamenn komnir óþarflega vel inn í leikinn og má kannski segja að þegar upp var staðið hafi okkar menn verið nokkuð heppnir að leiða með einu marki í leikhléi.

Síðari hálfleikur byrjaði á svipuðum nótum og sá fyrri en heimamenn voru talsvert fljótari að komast inn í leikinn. Okkar menn spiluðu að vísu ágætlega en ef allrar sanngirni er gætt er ekki hægt að líta framhjá því að Villa liðið var sterkari aðilinn í seinni hálfleik.

Sprækir og baráttuglaðir heimamenn fengu nokkur ágæt tækifæri til þess að jafna metin og þeirra besti sjéns kom á 86. mínútu þegar Benteke átti hörkuskot að marki af 12-13 metra færi. Mignolet sá sem betur fer aftur við landa sínum og varði boltann frábærlega í horn. 

Á 90. mínútu hefði Liverpool líklega átt að fá vítaspyrnu þegar Brad Guzan markvörður Villa felldi Sturridge í teignum. Mark Clattenburg dómari leiksins sá hinsvegar enga ástæðu til þess að flauta og skipaði Sturridge einfaldlega að standa í lappirnar.

Leikurinn fjaraði út og okkar menn fögnuðu þremur kærkomnum stigum á Villa Park. Lokatölur 0-1.

Liverpool: Mignolet, Johnson, Enrique, Toure, Agger, Leiva, Gerrard, Coutinho (Allen á 83. mín.), Aspas (Cissokho á 69. mín.), Henderson og Sturridge. Ónotaðir varamenn: Jones, Wisdom, Borini, Alberto og Sterling.

Mark Liverpool: Daniel Sturridge (21. mín.).

Gul spjöld: Lucas Leiva, Glen Johnson og Iago Aspas.

Aston Villa: Guzan, Lowton (El Ahmadi á 65. mín.), Vlaar, Okore, Luna, Bacuna, Westwood (Helenius á 83. mín.), Delph, Weimann (Tonev á 73. mín.), Benteke og Agbonlahor. Ónotaðir varamenn: Bowery, Clark, Herd, Sylla, Okore og Steer.

Gul spjöld: Lowton, Delph og Luna.

Áhorfendur á Villa Park: 42.098.

Maður leiksins: Simon Mignolet. Belginn hélt Liverpool á floti í síðari hálfleik og átti tvær magnaðar vörslur frá Christian Benteke undir lok fyrri og seinni hálfleiks.  

Brendan Rodgers: Það var mjög sterkt hjá okkur að vinna vel skipulagt Aston Villa lið í dag. Það var frábært að halda hreinu gegn góðu liði og ná að landa sigri. Við urðum að breyta taktíkinni okkar aðeins í dag. Við getum ekki alltaf verið Harlem Globetrotters, enda skiptir það okkur engu máli hvort við vinnum 4-0 eða 1-0.