Markaskorarar á afmælisdegi

Þegar Daniel Sturridge skoraði gegn Manchester United á Anfield sunnudaginn 1. sept varð hann 20. leikmaður liðsins til að skora á afmælisdaginn sinn.


Daniel fagnaði 24. afmælisdeginum sínum á besta mögulega hátt með því að skora eina mark leiksins og tryggja þar með Liverpool toppsæti deildarinnar um leið !

Síðasti leikmaður félagsins til að skora á afmælisdaginn sinn var Andy Carroll en hann skoraði eitt marka liðsins í 5-1 sigri á Oldham í FA Bikarnum á þrettándanum 2012. Þar áður var það Peter Crouch sem skoraði sigurmark í 2-1 sigri á West Ham á Upton Park í janúar 2007.

Robbie Fowler skoraði einnig á afmælisdaginn sinn, 31. apríl árið 2006 í 1-0 heimasigri á Bolton.  Markið er á mynd hér að ofan. Tveir leikmenn hafa svo afrekað það að skora tvö mörk á afmælisdaginn sinn.  Ronnie Whelan í 5-0 sigri á Southampton í september 1982 og Gordon Hodgson í 2-2 jafntefli gegn Bury á Anfield í apríl það herrans ár 1927 !

En sá leikmaður sem sennilega var hvað ánægðastur með framlag sitt á afmælisdaginn var Bobby nokkur Robinson (mynd fyrir neðan) sem skoraði öll fjögur mörkin í sigri á Leicester Fosse í gömlu 2. deildinni árið 1904.  Hann var jafnframt fyrsti leikmaður félagsins sem skoraði mark á afmælisdaginn sinn.


Allt í allt er árangur Liverpool, þegar afmælisbarn skorar fyrir félagið þessi:  15 sigrar, þrjú jafntefli og tvö töp. Það er því yfirleitt hið besta mál fyrir Liverpool ef afmælisbarn skorar!