Rauði herinn sýndi mátt sinn!

Þessi kvöldstund í Musterinu verður lengi í minnum höfð! Liverpool lék sinn besta leik á leiktíðinni, tók Everton í kennslustund og vann sinn stærsta sigur á þeim í áraraðir. Sigurinn var upp á 4:0 og hefði getað verið stærri Algjör snilldarleikur og hver einasti Rauðliði innan vallar sem utan lagði allt í sölurnar. Þegar svoleiðis er að verki staðið getur ekkert stöðvað Rauða herinn. Það finnst manni að minnsta kosti eftir svona magnaðan sigur!

Simon Mignolet kom að sjálfsögðu í markið eftir bikarleikinn um helgina og líkt og búist var við var Jon Flanagan settur í stöðu vinstri bakvarðar. Philippe Coutinho kom líka inn í liðið. Það var ljóst frá fyrstu andartökum þessa leiks að það yrði ekkert gefið eftir. Ekki að nokkrum kæmi það til hugar! 

Everton átti fyrstu marktilraunina eftir mínútu þegar hinn efnilegi Ross Barkley tók ripsu fram völlinn en fast langskot hans fór rétt yfir. Liverpool svaraði og Jordan Henderson tók boltann á lofti utan vítateigs en Tim Howard sló boltann frá. Á 8. mínútu hrökk boltinn til Luis Suarez utan við vítateiginn en Tim varði skot hans í horn. Eftir hornið sendi Steven Gerrard á Jordan en hann mokaði boltanum yfir úr góðri skotstöðu. Svipað hjá honum og á móti Bournemouth um helgina. 

Boltinn gekk hratt um allan völl og Bláliðar voru ekki síður baráttuglaðir en þeir Rauðu. Á 18. mínútu sendi Daniel Sturridge frábæra sendingu inn fyrir vörn Everton. Hann komst einn á móti Tim en Bandaríkjamaðurinn varði með góðu úthlaupi. Á 21. mínútu braut Liverpool ísinn í rigningunni. Luis tók horn frá vinstri. Hann sendi fasta spyrnu fyrir á nærstöngina og þar stökk Steven Gerrard manna hæst og stangaði boltann í markið af miklum krafti. Algjörlega magnað mark og fyrirliðinn svo og allir aðrir Rauðliðar gengu af göflunum. Snilldin ein! Um leið og markinu var fagnað var Romelu Lukaku borinn af velli og miðað við markaskorun hans á móti Liverpool þá var það til bóta.

Á 27. mínútu átti Daniel Sturridge gott bogaskot við vítateiginn vinstra megin sem fór rétt yfir fjærhornið. Everton náði í kjölfarið nokkrum hörðum sóknum. Kevin Mirallas tók rispu inn í vítateiginn og kom boltanum á Phil Jagielka sem náði góðu skoti úr miðjum vítateig en Simon Mignolet var vandanum vaxinn og varði. Gareth Barry fylgdi á eftir en skot hans fór víðsfjarri. Litlu síðar átti Kevin skot við vítateiginn sem smaug framhjá. Eftir þetta átti Everton ekki möguleika!

Á 33. mínútu náði Liverpool snöggri sókn. Við miðjuna átti Philippe Coutinho frábæra sendingu inn fyrir vörn Everton á Daniel Sturridge sem slapp einn í gegn. Þessi magnaði framherji gerði engin mistök og smellti boltanum framhjá Tim þegar hann var kominn inn í vítateiginn. Mögnuð afgreiðsla og fögnuðurinn mikill. Fögnuðurinn var vart búinn þegar Daniel skoraði aftur! Kolo Toure sendi langa sendingu fram völlinn, Daniel elti og eftir að boltinn hafði skoppað við vítateigslínuna lyfti hann boltanum meistaralega yfir Tim sem var kominn lengst út úr markinu. Algjörlega ótrúleg afgreiðsla og nú var Liverpool heldur betur með undirtökin eftir tvö mörk á þremur mínútum. Staðan var því aldeilis góð í leikhléinu!

Skiljanlega hóf Everton síðari hálfleikinn af krafti og varamaðurinn Leon Osman átti skot sem Simon gerði vel í verja. En svo til á sömu mínútu, þeirri 50., gerði Liverpool endanlega út um leikinn. Luis Suarez náði boltanum eftir misheppnaða sendingu Phil Jagielka á sínum vallarhelmingi. Phil og annar varnarmaður hundeltu Luis en hann hélt yfirvegun sinni, komst inn í vítateiginn og renndi boltanum af miklu öryggi neðst í hægra hornið. En eitt snilldarmarkið hjá þessum ótrúlega leikmanni. Hvað var eiginlega í gangi? Liverpol var komið í 4:0!

Fimm mínútum seinna var Raheem Sterling sloppinn í gegn. Tim felldi hann og dómarinn dæmdi víti. Öllum að óvörum leyfði Steven Gerrard Daniel Sturridge að taka vítið. Það tókst því miður ekki betur til en svo að Daniel skaut yfir og boltinn hafnaði uppi í Kop stúkunni! Þarna hefði Steven átt að skjóta sjálfur en það kom ekki að sök og öruggur stórsigur Liverpool var aldrei í hættu.
 
Everton reyndi að bæta úr og koma í veg fyrir enn stærra tap en Liverpool hefði allt í höndum sér. Hver einasti leikmaður Liverpool hélt áfram á fullu og það gáfust færi á fleiri mörkum. Eftir 60. mínútur fékk Philippe boltann eftir horn en skot hans úr þröngu færi vinstra megin strauk stöngina framhjá. Á 70. mínútu komst Daniel inn í vítateiginn eftir magnað upphlaup en hann missti boltann og hefði átt að gefa á Luis sem var í dauðafæri. Luis var heldur ekki ánægður en skiljanlegt var að Daniel vildi ná þrennunni! Daniel fór eftir þetta af velli og þó hann hefði misnotað tvö góð færi var ekki annað hægt en að dást af mörkunum hans tveimur sem fóru svo langt með að skapa sigurinn. 

Mörkin urðu ekki fleiri og Everton slapp við enn stærra tap. Líklega hefur þeim Bláu þótt nóg um 4:0 tap sem hefði vel getað verið stærra. Stuðningsmenn Liverpool skemmtu sér konunglega þar til leikurinn var flautaður af og þjóðsögnurinn var sunginn af miklum þrótti undir lokin. Þetta var einfaldlega besti leikur Liverpool á leiktíðinni og þessi sigur á Everton fer í annála. Algjör snilld innan vallar sem utan og þessi kvöldstund í Musterinu verður lengi í minnum höfð. Betra gerist það ekki og nú er að halda áfram á sömu braut!!!     

   

Liverpool: Mignolet; Flanagan (Kelly 73. mín.), Skrtel, Toure, Cissokho; Henderson, Gerrard, Coutinho (Alberto 79. mín.); Sterling, Sturridge (Moses 71. mín.) og Suarez. Ónotaðir varamenn: Jones, Aspas, Ibe og Smith.
 
Mörk Liverpool: Steven Gerrard (21. mín.), Daniel Sturridge (33. og 35. mín.) og Luis Suarez (50. mín.).

Everton: Howard; Stones, Alcaraz, Jagielka, Baines; McCarthy, Barry; Mirallas, Barkley (McGeady 76. mín.), Pienaar (Osman 46. mín.) og Lukaku (Naismith 25. mín.). Ónotaðir varamenn: Robles, Hibbert, Gueye, Osman og Garbutt.
 
Gul spjöld: Steven Pienaar, Gareth Barry og Kevin Mirallas.
 
Áhorfendur á Anfield Road: 44.450.

Maður leiksins: Steven Gerrard. Oft hefur fyrirliðinn tekið á honum stóra sínum á móti Bláliðum og kannski hefur hann einhvern tíma verið betri en hann var einfaldlega stórfenglegur í kvöld. Markið hans braut ísinn og fyrir utan það þá fór hann algjörlega á kostum. Hann tæklaði, átti frábærar sendingar og fór fyrir liðinu sínu sem aldrei fyrr. Reyndar var Steven fremstur meðal jafningja því allir leikmenn Liverpool voru frábærir.  

Brendan Rodgers: Ég er í skýjunum fyrir hönd leikmannanna og auðvitað stuðningsmannanna. Ég veit að það eru miklar tilfinningar í spilinu hér á Merseyside fyrir grannaleikina. Liðið lék frábærlega. Vörnin var góð, skyndisóknar okkar voru snilldarlegar og við höfðum góða stjórn á öllu. 
 
                                                                                     Fróðleikur.

- Þetta var 222. leikur Liverpool og Everton í öllum keppnum.

- Liverpool hefur unnið 88 leiki, Everton 66 og jafnteflin eru 68.

- Þetta var stærsti sigur Liverpool á Everton frá því í nóvember 1982. Liverpool vann þá 0:5 á Goodison Park.

- Liverpool vann síðast svona stóran sigur á Everton á Anfield Road í mars 1972. Sama markatala var þá uppi á teningnum.

- Everton hefur ekki unnið á Anfield Road á þessari öld!

- Steven Gerrard skoraði sjötta mark sitt á leiktíðinni.
 
- Hann lék sinn 31. leik á móti Everton og skoraði í níunda sinn.

- Daniel Sturridge er nú kominn með 16 mörk á keppnistímabilinu.

- Luis Suarez skoraði sitt 23. mark á sparktíðinni. 

- Þetta var fyrsti sigur Liverpool á Everton eftir að Brendan Rodgers tók við. Jafntefli hafði orðið í fyrstu þremur leikjunum undir hans stjórn. 

Hér eru myndir úr leiknum af Liverpoolfc.com.

Hér eru myndir úr leiknum af vefsíðu Liverpool Echo.

Hér eru myndir úr leiknum af vefsíðu Metro.

Hér er viðtal við Brendan Rodgers.