Spáð í spilin

Það er stórleikur á dagskrá í 25. umferð Úrvalsdeildarinnar er okkar menn fá topplið Arsenal í heimsókn.  Leikurinn hefst kl. 12:45 laugardaginn 8. febrúar.


Það er óhætt að segja að Arsenal hafi ágætt tak á Liverpool þegar kemur að Úrvalsdeildinni undanfarin ár.  Ekki hefur Liverpool fagnað sigri á Skyttunum á Anfield síðan 4-1 sigur vannst 31. mars 2007.  Síðan þá hafa liðin mæst sex sinnum á okkar heimavelli og hafa þrír leikir endað með jafntefli og þrír tapast, þar af tveir síðustu leikir.  Síðasti sigur á Arsenal vannst á Emirates vellinum 20. ágúst 2011 0-2.  Ef mér misreiknast ekki þá er árið 2014 núna og því löngu kominn tími á sigur !


Það er klárt mál að Brendan Rodgers og félagar þurfa að kveða niður ákveðna grýlu í þessum leik.  Sem fyrr eru þó meiðslavandræði í varnarlínunni en fyrsti valkostur af varnarmönnum er sem fyrr á meiðslalistanum.  José Enrique og Mamadou Sakho eru frá einhverjar vikur í viðbót en styttra er í að þeir Glen Johnson og Daniel Agger snúi til baka.  Þeir ná þó ekki þessum leik en gætu verið báðir með á miðvikudaginn gegn Fulham.  Lucas Leiva er svo ekki væntanlegur aftur fyrr en í mars.  Engin ný meiðsli hafa gert vart við sig eftir leikinn við W.B.A. á sunnudaginn þannig að líklega stillir Brendan Rodgers upp sama byrjunarliði en þó er ekki ólíklegt að Joe Allen komi inná miðjuna til að styrkja hana því miðja gestanna er jú ógnarsterk eins og flestir vita.

Meiðslavandræði eru þó líka í herbúðum Arsene Wenger og hans manna auk þess sem að Flamini er í leikbanni.  Jack Wilshere sem hefur verið meiddur undanfarið gæti þó náð þessum leik en þeir Kallström, Walcott, Ramsey, Sanogo og Diaby eru allir frá vegna meiðsla.  Vörn Arsenal hefur verið ein sú allra besta á leiktíðinni og þeir fá yfirleitt ekki á sig mörg mörk.  Þeir eru þó að fara að mæta einu besta sóknarliði deildarinnar og það þarf engan stærðfræðing til að reikna út að mörkin láta sjá sig á Anfield á morgun.


Síðasti leikur þessara liða á Anfield fór fram 2. september 2012 og var þetta einn af fyrstu leikjum Brendan með liðið.  Gestirnir fóru með sigur af hólmi 0-2 þar sem okkar menn ógnuðu lítið.  Lukas Podolski skoraði í fyrri hálfleik og Santi Cazorla í þeim síðari og þar við sat.

En hvað sem líður fyrri leikjum og meiðslum leikmanna okkar manna þá er ljóst að þeir leikmenn sem spila leikinn á morgun verða að leggja allt í sölurnar til að sigra.  Ætli liðið sér að halda 4. sætinu þá þurfa svona heimaleikir að vinnast eða að minnsta kosti að enda með jafntefli.  Það er líka kominn tími á sigur gegn Skyttunum og góður heimavallarárangur Liverpool á tímabilinu heldur vonandi áfram á morgun.  Það er klárt mál að stemmningin verður góð á Anfield og leikmenn ná vonandi að gíra sig upp í stemmningunni.

Spáin er svona að þessu sinni:  Leikurinn verður fjörugur þar sem bæði lið vilja pressa hátt uppi á vellinum og nýta sér mistök andstæðinganna.  Einnig geta bæði lið sótt mjög hratt fram í skyndisóknum ef sá gállin er á þeim.  Leikurinn endar með 2-2 jafntefli þar sem einhver dramatík mun eiga sér stað, hvoru megin vallarins er óljóst sem stendur !