Fowler áritar í ReAct á laugardaginn

Eins og við höfum kynnt kyrfilega hér á vefnum er Robbie Fowler, öðru nafni ,,Guð", að koma hingað til lands um næstu helgi og verður heiðursgestur á árshátíð Liverpoolklúbbsins á laugardagskvöld.


En þó að færri hafi komist að en vildu á árshátíðina sjálfa munu gefast önnur tækifæri til að heilsa upp á kappann.

Á laugardaginn milli kl. 11 og 13 mætir Fowler í ReAct, Bæjarlind 4 í Kópavogi, þar sem hann mun árita treyjur, myndir og hvaðeina sem fólk vill að hann kroti á.

Þar gæti jafnvel verið tækifæri til að fá að mynda sig með kappanum. Við hvetjum fólk til að mæta tímanlega því búast má við töluverðri örtröð.

Robbie Fowler verður einnig á Spot kl. 15 að fylgjast með leik Liverpool og Cardiff og þar gefst einnig tækifæri til að fá áritun og/eða mynd af sér með kappanum. Robbie lék auðvitað með Cardiff eftir að hann var í seinni dvöl sinni hjá Liverpool. Myndirnar að ofan eru einmitt teknar þegar liðin mættust í Deildarbikarnum. Liverpool vann 2:1. Við skorum því á ykkur að nýta þetta einstaka tækifæri til að sjá eina af goðsögnum Liverpool með eigin augum.