Munum halda ró okkar

Liverpool er á fullu í toppbaráttunni. Luis Suarez hefur sannarlega lagt sitt af mörkum með öllum mörkunum sínum. Spennan er mikil við toppinn en hann sgir að leikmenn Liverpool muni halda ró sinni. Luis skoraði þrennu í leiknum ótrúlega á móti Cardiff en nú einbeita allir sér að leiknum við Sunderland annað kvöld. Luis sagði meðal annars þetta eftir sigurinn á Cardiff.

,,Við erum mjög vel stemmdir núna. Við vitum að við höfum spilað mjög vel í síðustu leikjum og þess vegna er ég mjög ánægður með hvernig við spiluðum. Við munum þó halda ró okkar því við gerum okkur fulla grein fyrir því hversu Úrvalsdeildin er erfið. Við höldum okkar striki fyrir næsta leik og nú fer öll einbeiting okkar í að eiga góðan leik á móti Sunderland."

Chelsea vann stósigur á Arsenal um hádegisbilið áður en Liverpool hóf leik í Cardiff. Luis segir að leikmenn Liverpool hafi fyrst og fremst einbeitt sér að sínum leik.

,,Við vissum um úrslitin hjá Chelsea en við einbeittum okkur fyrst og fremst að okkar leik. Við vissum að við hefðum spilað mjög vel í síðustu leikjum. Þetta var ótrúlegur leikur. Hann var eins og útileikurinn við Stoke City sem endaði 5:3. Það er erfitt þegar við vorum að skora en svo Cardiff líka hinu megin. En við spiluðum mjög vel í dag og við munum halda áfram í næstu viku."

Luis Suarez skoraði enn eina þrennuna og það var komið langt fram í viðbótartíma þegar hann skoraði þriðja markið. Hann slapp þá einn í gegnum vörn Cardiff eftir langa sendingu fram frá Martin Skrtel. Raheem Sterling var með honum og Luis hefði vel getað gefið á hann en ákvað að skora sjálfur til að ná þrennunni. Það gerði hann og innsiglaði 3:6 sigur Liverpool. Hann bað Raheem afsökunar eftir leikinn á því að hafa ekki gefið á hann!

,,Ég ákvað að ná þrennunni fyrir sjálfstraustið mitt. Ég bað Raheem afsökunar. Ég er mjög ánægður með að hafa fengið boltann fyrir þrennuna og mér líður vel því Liverpool vann leikinn. Við erum mjög ánægðir með hvernig við spiluðum í dag."