Gerðum allt til að halda Luis

Luis Suarez mun ekki spila aftur með Liverpool. Hann var staðfastur í því að komast í burtu frá Liverpool. Allt var þó reynt til að halda honum hjá Liverpool en allt kom fyrir ekki segir Brendan Rodgers. Hann hafði meðal annars þetta að segja í viðtali við Liverpool Echo. 

,,Sem félag þá reyndum við allt til að halda Luis. Hann vildi fara til Spánar og spila þar og því miður er það svo þegar leikmaður vill ekki lengur vera þá verður félagið að sætta sig við það. Þetta var hans ákvörðun. Hann er nú farinn til Barcelona. Það var félagið sem hann vildi spila með og nú verðum við að halda okkar striki."

Brendan átti frekar von á því að Luis yrði áfram hjá Liverpool en annað kom á daginn. 

,,Mér fannst hann ekki vera á þeim buxunum að vilja fara þegar síðustu leiktíð lauk en á hinn bóginn sagði hann aldrei að hann mundi vera ennþá hjá okkur að ári. Hann var auðvitað búinn að gera nýjan samning við okkur og við höfðum þá tryggingu. En ég held að Luis hafi þjónað okkur mjög vel og við getum ekkert verið að hafa áhyggjur af öllu þessu úr því sem komið er. Þetta er búið og gert og við verðum bara að einbeita okkur að því sem framundan er." 

Því miður vildi Luis Suarez ekki vera lengur hjá Liverpool. Ekki þýðir að fást um það en það er mjög stórt skarð fyrir skildi núna. Það er nefnilega ekki neinn hægðarleikur að fá leikmann í stað leikmanns sem er einn sá besti í heimi. En það ber að hafa þau gömlu sannindi í huga að enginn leikmaður er stærri en Liverpool Football Club!