fös. 29. ágúst 2014 13:54 | Heimir Eyvindarson

Spáð í spilin

Liverpool mætir Tottenham á sunnudaginn á White Hart Lane. Ljóst er að Tottenham menn vilja ólmir hefna ófaranna frá síðustu leiktíð, þegar Liverpool kjöldró Lundúnaliðið heima og heiman.

Liverpool heimsótti Tottenham síðast á White Hart Lane þann 15. desember í fyrra. Skemmst er frá því að segja að okkar menn fóru á kostum í leiknum og þegar yfir lauk höfðu þeir komið boltanum fimm sinnum í mark Tottenham, án þess að heimamenn næðu að svara fyrir sig. Þetta var stærsta tap Tottenham á heimavelli í 16 ár og jafnframt stærsti sigur okkar manna í sögunni á White Hart Lane. Slík var niðurlægingin að meira að segja Jon Flanagan skoraði í leiknum, sitt fyrsta mark fyrir aðalliðið.

Þetta stórtap reyndist vera síðasti naglinn í líkkistu André Villas-Boas þáverandi stjóra Tottenham. Hann tók pokann sinn strax daginn eftir.

Í seinni umferðinni mættust liðin svo á Anfield, í lok mars, og þá tók ekki betra við hjá Lundúnaliðinu. Liverpool sigraði þann leik 4-0 þannig að samanlagt unnu okkar menn Tottenham 9-0 á síðustu leiktíð. Það er alveg morgunljóst að Tottenham menn vilja ekki að sú harmsaga endurtaki sig.

Tottenham liðinu gekk hálf brösuglega á síðustu leiktíð og óhætt að segja að frammistaða liðsins hafi verið langt undir væntingum, sem voru ansi miklar eftir að liðið hafði farið mikinn á leikmannamarkaðnum sumarið 2013. Liðið hefur hins vegar farið vel af stað á þessari leiktíð og trónir sem stendur á toppi deildarinnar með 6 stig og fimm mörk í plús. Það er þessvegna klárt mál að okkar manna bíður erfitt verkefni á sunnudaginn.

Liverpool liðið tapaði fyrir fjórum liðum á síðustu leiktíð, þar af bæði Southampton og Manchester City, liðunum sem liðið hefur mætt í fyrstu tveimur umferðunum á þessari leiktíð. Þess má geta að núverandi stjóri Tottenham, Mauricio Pochettino, var við stjórnvölinn hjá Southampton þegar suðurstrandarliðið varð fyrst allra liða til þess að leggja Liverpool að velli á síðustu leiktíð.

Okkar menn náðu að hirða öll stigin í viðureigninni við Southampton á dögunum en lutu svo hressilega í gras gegn Manchester City um síðustu helgi. Ef leikurinn gegn Tottenham tapast verður liðið í neðri hluta deildarinnar, á svipuðum slóðum og erkifjendurnir í Manchester United. Ekki viljum við að það gerist.

Liverpool liðið saknar vitanlega Luis Suarez sem hvarf til nýrra starfa í sumar, eftir ótrúlegan feril í Bítlaborginni, en samt sem áður er það varnarleikur liðsins en ekki sóknarleikurinn sem er helsta áhyggjuefni stuðningsmanna félagsins.

Hinir ungu spænsku bakverðir, Javier Manquillo og Alberto Moreno, virðast ekki alveg tilbúnir í hraðann í ensku úrvalsdeildinni, Glen Johnson heldur áfram að vera heillum horfinn og austur-evrópsku varnardrekarnir Martin Skrtel og Dejan Lovren hafa ekki náð nægilega vel saman í miðverðinum það sem af er.

Það verður reyndar að teljast líklegt að Mamadou Sakho verði með Lovren í hjarta varnarinnar á sunnudaginn, þar sem Skrtel er eitthvað laskaður og Daniel Agger virðist vera á förum. Það verður spennandi að sjá hvernig Sakho og Lovren gengur að vinna saman, en það er teymi sem margir telja vænlegt til árangurs. Lovren var jú keyptur til þess að verða leiðtoginn í vörninni sem okkur hefur vantað of lengi og það er vissulega verðugt verkefni að temja hinn þrælvillta Sakho!

Jose Enrique mun allur vera að koma til og hver veit nema hann verði í vinstri bakverðinum á sunnudaginn. Þá mun Adam Lallana vera orðinn leikfær og allt eins víst að hann fái að spreyta, sérstaklega þar sem Coutinho hefur ekki farið nægilega vel af stað í deildinni, eftir frábæra spretti á undirbúningstímabilinu.

Mesta spennan hjá stuðningsmönnum Liverpool er þó tengd nýjasta leikmanni félagsins, hinum óútreiknanlega Mario Balotelli sem kom til félagsins frá AC Milan í upphafi vikunnar.

Brendan Rodgers sagði á blaðamannafundi í dag að Balotelli virkaði mjög frískur á æfingum og væri í góðu formi, þótt hann væri ekki í mikilli leikæfingu. Rodgers sagði einnig að það kæmi ýmislegt til greina með Balotelli, hann gæti spilað frammi með Daniel Sturridge, einn uppi á topp eða jafnvel úti á kanti. Vonandi fáum við að sjá Ítalann litríka á sunnudaginn og helst af öllu viljum við auðvitað sjá betri hliðar þessa undarlega knattspyrnumanns, sem getur svo sannarlega bæði verið hetja og skúrkur. Svona eftir því hvernig liggur á honum.

Ég verð að segja að ég er ekkert sérstaklega bjartsýnn fyrir sunnudaginn. Liverpool liðið hefur ekki verið sannfærandi í upphafi leiktíðar, en að sama skapi hefur Tottenham liðið byrjað vel. Sóknarleikur Tottenham hefur verið frísklegur og það verður því miður að teljast líklegt að sóknarmenn Tottenham muni valda ósannfærandi varnarlínu okkar manna vandræðum í leiknum. Ég ætla að spá 3-1 tapi, en ljósið í myrkrinu verður glæsimark Balotellis. Mikið óskaplega vona ég að ég hafi rangt fyrir mér.

YNWA!

Vissir þú?