Mario Balotelli tilbúinn í slaginn

Mario Balotelli er tilbúinn í slaginn og bíður eftir að spila sinn fyrsta leik fyrir Liverpool. Ítalski landsliðsmaðurinn er búinn að æfa af krafti frá því hann kom í herbúðir Liverpool á mánudaginn.

Hermt er að Mario hafi lagt mjög hart að sér á æfingum til að komast í byrjunarliðið hjá Brendan Rodgers á White Hart Lane gegn Tottenham í dag.

Mario mun koma mjög ákveðinn til Liverpool þar sem hann telur að þetta sé kannski hans síðasta tækifæri til að koma sér almennilega á blað hjá stórliði. Umboðsmaður hans áréttaði einmitt þetta í viðtali við fjölmiðla eftir að Mario var búinn að ganga frá sínum málum við Liverpool. 

Það er nú svo sem ekki þannig að Mario hafi ekki látið að sér kveða á ferlinum hingað til. Hann hefur jú unnið fjölda titla með Inter Milan og Manchester City. En margir telja að Mario hafi enn ekki náð að uppfylla hæfileika sína til fulls og nú sé komið að því að leggja allt rugl til hliðar og taka á því. Við vonum að Liverpool fái það besta út úr ítalska sóknarmanninum.