Naumur sigur á Swansea

Brendan Rodgers gerði heilmiklar breytingar á liðinu sem gerði markalaust jafntefli við Hull á laugardaginn. Steven Gerrard og Raheem Sterling fengu langþráða hvíld og voru ekki einu sinni í hóp. Mario Balotelli, Martin Skrtel, Alberto Moreno, Simon Mignolet, Adam Lallana og Emre Can, sem allir voru í byrjunarliðinu gegn Hull byrjuðu kvöldið á bekknum. 

Liverpool var mun sterkara liðið á vellinum strax frá byrjun. Swansea lá aftarlega á vellinum og varðist fimlega, meðan okkar menn léku boltanum sín á milli án þess að skapa verulega hættuleg færi. Sóknarleikur Liverpool var býsna líflegur á köflum, sérstaklega voru Coutinho og Borini sprækir.

Besta tilraun hálfleiksins kom frá Borini á 37. mínútu þegar hann skaut föstu skoti að marki frá vítateigshorni, en hinn aldni Þjóðverji Gerhard Tremmell í marki Swansea varði boltann vel í horn.

Undir lok hálfleiksins komust gestirnir frá Wales betur inn í leikinn og gerðust ansi aðgangsharðir upp við vítateig okkar manna. Á 45. mínútu tók fyrrum Liverpool maðurinn Jonjo Shelvey aukaspyrnu rétt utan vítateigsins og náði góðu skoti á markið, en sem betur fer var Brad Jones vel á verði í markinu og varði skot Shelveys út í teig. Nokkrum sekúndum síðar flautaði Keith Stroud dómari leiksins hálfleikinn af og liðin héldu markalaus til búningsherbergjanna.

Síðari hálfleikur byrjaði á svipuðum nótum og sá fyrri. Liverpool var meira með boltann en tókst ekki að brjóta varnarlínu Swansea á bak aftur. Á 65. mínútu náðu gestirnir hinsvegar yfirhöndinni í leiknum þegar Marvin Emnes skoraði með góðu skoti úr teignum. Emnes var nokkuð heppinn að fá boltann, en afgreiðslan var góð og staðan orðin 0-1.

Liverpool hélt áfram að sækja en gekk lítið. Það var ekki fyrr en á 86. mínútu að jöfnunarmarkið kom. Það skoraði enginn annar en Mario Balotelli, sem var tiltölulega nýkominn inná völlinn. Fabio Borini átti góða fyrirgjöf utan af kanti og Balotelli afgreiddi boltann örugglega í hornið, framhjá Tremmell. Staðan jöfn á Anfield og allt stefndi í framlengingu í deildabikarnum, aðra umferðina í röð.

Í uppbótartíma bar til tíðinda, en þá fékk Fernandez í vörn Swansea að fjúka útaf með rautt spjald eftir brot á Coutinho. Balotelli tók aukaspyrnuna, en skaut yfir markið.

Örfáum andartökum síðar fékk Liverpool aðra aukaspyrnu. Hana tók Coutinho, smellti boltanum á kollinn á Lovren sem skallaði hann í bláhornið framhjá Tremmell sem fór í undarlegt úthlaup og hefði átt að gera betur. Sigurinn tryggður. Lokatölur á Anfield 2-1.

Liverpool: Jones, Manquillo, Toure, Lovren, Johnson, Lucas, Henderson, Coutinho, Markovic (Lallana á 70. mín.), Lambert (Balotelli á 79. mín.), Borini. Ónotaðir varamenn: Mignolet, Skrtel, Can, Rossiter.

Mörk Liverpool: Balotelli á 86. mín. og Lovren á 94. mín. 

Gult spjald: Toure á 90. mín.

Swansea: Tremmell, Rangel, Fernandez, Williams, Taylor, Fulton (Carroll á 88. mín.), Shelvey, Emnes, Dyer, Montero, Gomis (Bony á 81. mín.). Ónotaðir varamenn: Fabianski, Bartley, Routledge, Shephard, Barrow.

Mark Swansea: Emnes á 65. mín.

Gul spjöld: Williams, Taylor og Fulton.

Rautt spjald: Fernandez.

Maður leiksins: Coutinho var besti maður Liverpool í kvöld. Brassinn var sprækur frá fyrstu mínútu og skapaði alltaf hættu þegar hann fékk boltann. Borini og Lucas voru einnig líflegir. 


- Liverpool og Swansea hafa nú mæst 20 sinnum á Anfield. Swansea hefur einungis sigrað tvær af þessum viðureignum, síðast í 4. umferð deildabikarsins 2012-2013. 

- Þetta var í fyrsta sinn frá árinu 2006 sem Liverpool leggur lið úr Úrvalsdeild að velli í deildabikarnum á Anfield. Þá lá Reading í valnum 4-3.

- Hér má sjá myndir úr leiknum