Fræg fyrir leik

Frægi stuðningsmaðurinn sem spáir í spilin með okkur hér á síðunni er ekki af verri endanum þessa vikuna. Það er engin önnur en Katrín Ómarsdóttir leikmaður Liverpool. 

Hvenær byrjaðir þú að halda með Liverpool?
Ég hef verið svona 5-6 ára. Eldri bróðir minn hélt með Liverpool og svo leist mér ansi vel á Stan Collymore. Ég hef haldið með liðinu síðan.

Hver er þinn uppáhalds Liverpool leikmaður allra tíma?
Michael Owen var í miklu uppáhaldi þegar ég var yngri. Algjör unun líka að horfa á Suarez spila, en það er erfitt að horfa framhjá Gerrard. Ætli ég verði ekki að segja Gerrard. En ég vildi að ég hefði verið uppi þegar Kenny Dalglish og þeir voru að spila.

Hver er í mestu uppáhaldi af núverandi leikmönnum liðsins?
Fyrir utan Gerrard líst mér vel á Emre Can. Langar að sjá meira af honum, en ég held að hann verði bara betri með aldrinum. Svo væri gaman að sjá Coutinho spila meira. Svo gaman að horfa á hann með boltann.  

Ef þú mættir kaupa einn leikmann að eigin vali til Liverpool, hver yrði fyrir valinu?
Iniesta kemur fyrst upp í hugann. Eða Fabregas.

Hvernig fer leikurinn gegn Newcastle um helgina?
Newcastle menn mæta fullir sjálfstraust eftir sigurinn gegn City. Þeir virðast vera að pikka sig upp eftir slæma byrjun. Erfiður völlur fyrir Liverpool að fara á, en ég verð að treysta á mína menn. 1-2. Balotelli skorar. 

Í hvaða sæti endar Liverpool í vor?
4. sæti.

Sem leikmaður Liverpool hefurðu væntanlega hitt leikmenn karlaliðsins nokkrum sinnum. Hver er skemmtilegastur í þeim ágæta hópi?
Við höfum hitt hópinn nokkrum sinnum og þeir eru fínir. Þeir sem hafa verið hressastir eru yfirleitt Kolo og Sturridge. Kolo er bara hress!