Fræg fyrir leik

Frægi stuðningsmaður þessarar viku er sjálf Katrín Jakobsdóttir formaður VG og fyrrverandi Mennta- og menningarmálaráðherra. Hún hefur haldið með Liverpool frá barnæsku og er bjartsýn fyrir leik helgarinnar.

Hvenær byrjaðir þú að halda með Liverpool?
Þegar ég var 5 ára, þá hreifst ég mjög af hinum rauðu búningum og auðvitað markmanninum Bruce Grobbelaar sem var mikill grínisti og höfðaði mjög til 5 ára húmorsins. 

Hver er þinn uppáhalds Liverpool leikmaður allra tíma? 
Grobbelaar auðvitað og svo Ian Rush sem var hetja á þessum tíma; skoraði eins og vindurinn og ég sá hann svo spila á móti KR á Laugardalsvelli.
Hver er í mestu uppáhaldi af núverandi leikmönnum liðsins?
Mario Balotelli af því að ég held alltaf með þeim sem eiga undir högg að sækja og svo er hann áhugaverð persóna. Svo var Steven Gerrard alltaf í uppáhaldi í gamla daga. 

Ef þú mættir kaupa einn leikmann að eigin vali til Liverpool, hver yrði þá fyrir valinu?
Það er eftirsjá að Luis Suarez, það vantar smá bit í sóknina. Kannski á bara að kaupa hann aftur?

Hvernig fer leikurinn gegn Crystal Palace?
Við burstum þá, engin spurning.

Í hvaða sæti endar Liverpool í vor?
Sætið skiptir ekki öllu, öllu skiptir að við endum fyrir ofan Man Utd. En ég segi þriðja til fjórða.