Sterling vill vera sem lengst hjá Liverpool

Viðræður milli Liverpool og Raheem Sterling um nýjan samning leikmannsins unga eru nú í fullum gangi. Sterling er ánægður með sig í Liverpool og vill vera hjá félaginu í mörg ár til viðbótar.

„Liverpool er í samningaviðræðum við umboðsmann minn og það er ágætur gangur í þeim viðræðum. Vonandi fer allt að verða klárt", segir Sterling í samtali við Liverpool Echo. 

„Mér líður vel hér og ég vil gjarnan vera hér í mörg ár til viðbótar. Minn draumur er að lyfta bikurum með Liverpool og ná mínum markmiðum inni á fótboltavellinum með þessu liði."

„Ég er afar ánægður með það traust sem stjórinn hefur sýnt mér og ég held að aðrir ungir leikmenn hljóti að horfa til þess hvernig mér hefur gengið hér og hversu mikla hjálp ég hef fengið hjá stjóranum. Og ekki bara ég, hann hefur sýnt mörgum ungum leikmönnum mikið traust."

„Ef ég lít til baka, tvö ár aftur í tímann, þegar ég var að byrja að æfa með aðalliðinu, þá reyndi maður eins og maður gat að ganga í augun á stjóranum og þjálfurunum og mér tókst að vekja athygli þeirra. Síðan þá hefur stjórinn stöðugt gefið mér góð ráð sem hafa gert mig að betri knattspyrnumanni. Ekki hvað síst ráð um það hvernig ég eigi að haga lífi mínu utan vallar."

„Ég var ekki nógu mikill fagmaður, hvíldist ekki nóg o.s.frv. Stjórinn hefur farið mjög vel yfir þessa hluti og nú hef ég breytt um lífsstíl. Ég reyni alltaf að vera betri í dag en í gær, ekki bara inni á vellinum heldur líka í daglega lífinu. Það hefur gert mig að betri knattspyrnumanni." 

Sterling er þrátt fyrir ungan aldur nú þegar orðinn lykilmaður í liði Liverpool og hefur leikið 93 leiki fyrir aðalliðið. Þá er hann einnig á góðri leið með að vera lykilmaður í enska landsliðinu. Það er talsverð pressa á ekki eldri leikmann og stundum er erfitt að standa undir væntingum og höndla pressuna sem fylgir velgengninni. Það vakti til að mynda töluvert neikvætt umtal fyrr í haust þegar Brendan Rodgers mæltist til þess við Roy Hodgson landsliðsþjálfara Englendinga að Sterling fengi smá hvíld frá landsliðinu. Það tók töluvert á hinn unga Sterling. 

„Þetta var í fyrsta sinn sem ég þurfti að takast á við eitthvað af þessu tagi, en ég held reyndar að það hafi gengið ágætlega hjá mér. Ég reyndi bara að kúpla mig frá umræðunni og passaði mig á að taka það sem ég heyrði ekki of mikið inn á mig."  

„Þetta var erfiður tími, en svona lagað lærist vonandi með tímanum. Það eina sem vakir fyrir mér er að gera mitt besta fyrir bæði Liverpool og England. Ef einhver hefur skilið orð mín og gjörðir á einhvern annan hátt, þá er ég leiður yfir því."

Liverpool heimsækir Crystal Palace á morgun og Sterling vonast vitanlega eftir góðum úrslitum.

„Það hefur ekki gengið alveg nógu vel hjá okkur en ég er viss um að þetta fer að ganga betur. Mér fannst við spila ágætlega á löngum köflum gegn Chelsea og við hefðum átt að fá eitthvað út úr þeim leik. Það hefði gert stöðuna betri. Ég held að við þurfum bara einn góðan leik og þá smellum við í gírinn aftur. Þetta snýst að svo stórum hluta um að við fáum sjálfstraustið aftur. Vonandi gerist það á móti Palace."