Fræg fyrir leik

Þorgerður Katrín Gunnarsdóttir fyrrverandi menntamálaráðherra er einn fjölmargra frægra stuðningsmanna Liverpool. Hún er ekki í nokkrum vafa um að Liverpool sigrar borgarslaginn á laugardaginn. 

Þorgerður Katrín er „Fræg fyrir leik" að þessu sinni.

Hvenær byrjaðir þú að halda með Liverpool?
Ég náði í lokin hjá Bill Shankly 1973/1974, en Bob Paisley sem tók við af honum 1974 var alltaf í miklu uppáhaldi hjá mér. Hann gerði leikinn þá fyrir mig skemmtilegan, enda margir sterkir karakterar í liðinu. 

Hvaða leikmaður í Liverpool sögunni er í mestu uppáhaldi hjá þér?
Er ósköp klassísk þegar kemur að liðinu mínu. King Kenny er fyrsta val, en ég var ávallt ánægð með Ray Clemence markvörð og Ian Callaghan, sem er langleikjahæsti leikmaður félagsins. Er sem sagt pínu föst þarna á áttunda áratugnum.

Hvaða leikmaður er í mestu uppáhaldi af núverandi leikmönnum liðsins?
Gerrard - ekki spurning. Stend með honum út í eitt.


Ef þú mættir kaupa einn leikmann að eigin vali til Liverpool, hver yrði þá fyrir valinu?
Ronaldo - styrkir öll lið og er algerlega frábær. En svo er auðvitað alltaf stuð í kringum Suarez. Ef maður á að vera aðeins raunsærri þá hef ég hef mikla trú á því að Ítalinn Marco Veratti hjá PSG gæti farið langt með að fylla skarð Gerrard. Góður kostur.

Hvernig fer leikurinn gegn Everton um helgina?
3-1 - að sjálfsögðu fyrir Liverpool.

Í hvaða sæti endar Liverpool í vor?
Liverpool endar í 4. sæti, eftir góðan endasprett sem nú þegar er hafinn.