Spáð í spilin

Stórleikur helgarinnar er viðureign okkar manna við Arsenal á Emirates leikvanginum í London. Þetta er fyrsti leikur 31. umferðar og hefst hann kl. 11:45 laugardaginn 4. apríl.

Það hefur verið aðeins stormasamt í vikunni vegna viðtals sem Raheem Sterling veitti við breska ríkisútvarpið. Brendan Rodgers sagði á blaðamannafundi að félagið hefði ekki veitt Sterling leyfi til að veita þetta viðtal og það hefði komið honum og öðrum stjórnendum félagsins í opna skjöldu þegar þeir fréttu af því. Mörgum virðist ljóst að Sterling sé farinn að leita á önnur mið en það breytir því ekki að hann er enn leikmaður félagsins og samningsbundinn því til ársins 2017. Rodgers og öðrum stjórnendum er vonandi treyst til að taka almennilega á þessu máli og fá Sterling til að átta sig á því að svona upphlaup er ekki vænlegt til árangurs.

En snúum okkur að leiknum sjálfum. Rodgers sagði einnig á blaðamannafundi í gær að Daniel Sturridge sé klár í slaginn eftir að hafa byrjað að æfa að fullum krafti á ný á Skírdag. Óvíst er með þátttöku Adam Lallana en athugað verður með stöðuna á honum í dag, föstudaginn langa. Þeir Dejan Lovren og Jordon Ibe eru einnig á sjúkralistanum en Lovren ætti að öllum líkindum að vera klár í slaginn en ekki er alveg vitað með Ibe þar sem hann er búinn að vera lengur frá vegna meiðsla. Ekki veitir af að fá Lovren inn þar sem Martin Skrtel er í banni. Lucas Leiva kemur svo vonandi aftur inn í liðið eftir meiðsli og er þar sömu sögu að segja með hann, ekki veitir af þar sem Steven Gerrard er líka í banni.

Heimamenn í Arsenal glíma aldrei þessu vant ekki við mikil meiðsli, Danny Welbeck verður líklega klár í slaginn en ljóst er að Alex Oxlade-Chamberlain verður ekki með vegna meiðsla, aðrir leikmenn liðsins eru klárir í slaginn.

Það verður við ramman reip að draga því Arsenal hafa unnið síðustu sex leiki sína í deildinni og aðeins einn leikur hefur tapast á heimavelli á leiktíðinni. Okkar menn hafa heldur ekki verið að ná góðum úrslitum á þessum velli í gegnum tíðina. Síðast þegar liðin mættust í deildinni á Emirates unnu Arsenal 2-0 sigur, nánar tiltekið í nóvember árið 2013. Liverpool hefur aðeins unnið einn af síðustu 8 viðureignum liðanna á útivelli, sá sigur kom í ágúst árið 2011, fjórir leikir hafa endað með jafntefli og Arsenal hafa unnið þrjá leiki.

Staða liðanna í deild er þannig að Arsenal eru í þriðja sæti með 60 stig, okkar menn eru í því fimmta með 54 stig. Sigur er því nánast lífsnauðsynlegur ætli Liverpool sér ekki að detta nánast út úr baráttunni um að komast í topp fjóra í deildinni þetta tímabilið.

Undirritaður hefur ekki mikla trú á því að góð úrslit náist á morgun, Arsenal eru að spila mjög vel um þessar mundir og þegar komið er á þetta stig tímabilsins hafa þeir oftar en ekki stigið upp og náð góðum úrslitum til að tryggja sig í topp fjóra í deildinni. Spáin að þessu sinni er því sú að 3-1 tap lítur dagsins ljós og mikilvægi leiksins við Blackburn í miðri viku verður enn meira fyrir vikið.