Skrtel skrifar undir nýjan samning

Martin Skrtel skrifaði í dag undir nýjan samning við Liverpool. Samningurinn er til þriggja ára.

Martin Skrtel kom til Liverpool í janúar 2008, frá Zenit í Pétursborg. Það stefnir þessvegna allt í það að hann muni ná að leika í heil 10 ár fyrir Liverpool, ef ekki lengur, en samningurinn gildir fram á sumarið 2018. 

Skrtel verður 31 árs í desember. Hann hefur leikið 220 leiki fyrir Liverpool og skorað í þeim 15 mörk. Hann hefur reyndar skorað nokkur sjálfsmörk líka, en við erum ekkert að rifja þau upp í dag.

Skrtel er fastur maður í landsliði Slóvakíu og hefur leikið 73 landsleiki fyrir þjóð sína og skorað fimm mörk.

Slóvakinn er einn af þeim sem taldir eru koma til greina í varafyrirliðastöðuna hjá Liverpool á næstu leiktíð en hann, Lucas Leiva, Mamadou Sakho og James Milner hafa oftast verið nefndir í því sambandi.