Hat-trick hetjur

Divock Origi og Daniel Sturridge eru einu leikmennirnir í núverandi leikmannahópi Liverpool sem hafa skorað þrennu fyrir félagið. Michael Owen og Robbie Fowler eiga metið.

Divock Origi skoraði þrennu gegn Southampton í deildabikarnum á miðvikudaginn. Hann fékk það reyndar ekki staðfest fyrr en eftir leik að hann hefði skorað þrennu, því fyrsta markið sem var skráð á hann skpraði Alberto Moreno, en af því að boltinn hafði örlitla viðkomu í Origi var það skrá á hann.

Eins og við höfum sagt frá hér á síðunni var Belginn ungi alveg til í að láta Moreno eiga markið, en þeir stjórna því víst ekki sjálfir drengirnir, þannig að þrennan var staðreynd.

Origi komst í ansi hreint fríðan flokk framherja með þrennunni, því fram að leiknum á miðvikudag voru Ian Rush, Robbie Fowler, Michael Owen og Fernando Torres einu mennirnir sem höfðu skorað þrennu fyrir Liverpool í deildabikarnum. Ekki amalegur félagsskapur það.

Þess ber reyndar að geta að talningin miðast við þrennur frá árinu 1992, þegar Úrvalsdeildin fór af stað. Þegar allar keppnir eru taldar, frá árinu 1992, kemur í ljós að gulldrengirnir Robbie Fowler og Michael Owen eiga flestar þrennur á afrekaskránni, eða 10 stykki hvor.

Robbie Fowler skoraði sitt fyrsta hat-trick einmitt í deildabikarnum eins og Origi. Það var 5. október 1993 í 5-0 heimasigri Liverpool gegn Fulham. Fowler skoraði síðan sína fyrstu þrennu í deildinni 25 dögum síðar, í 4-2 sigri Liverpool á Southampton. Fowler og Origi eru einu leikmenn Liverpool frá 1992 til að skora þrennu gegn Southampton, en Fowler afrekaði það reyndar tvisvar því hann smellti aftur í þrennu gegn Southampton í janúar 1999, þegar Liverpool rótburstaði „Dýrlingana" 7-1 á Anfield.

Michael Owen á það sameiginlegt með Fowler og Origi- og reyndar Fernando Torres líka - að fyrsta þrennan kom í deildabikarnum. Owen skoraði fyrstu þrennuna í 3-0 sigri Liverpool á Grimsby í deildabikarleik á Anfield 18. nóvember 1997. Fyrsta þrenna Owen í deildinni kom í 3-3 jafntefli við Sheffield Wednesday í febrúar 1998. Þess má geta að Owen skoraði þrjár þrennur í Úrvalsdeild árið 1998. Gegn Wednesday, Nottingham Forest og Newcastle, en hann er sá eini sem hefur skorað þrennu gegn Newcastle (tvær meira að segja). Vonandi bætist einhver okkar manna í þann hóp í dag.

Næstur á eftir Owen og Fowler á þrennulistanum er Luis Suarez, en hann gerði sex sinnum hat-trick í Liverpool búningnum. Þar af þrisvar gegn Norwich! Þrennur Suarez komu allar í Úrvalsdeildinni, á tæplega tvegga ára tímabili; frá apríl 2012 til mars 2014.

Robbie Fowler á flest hat-trick okkar manna í Úrvalsdeild, en hann skoraði 8 þrennur í deildinni, þá fyrstu í október 1993 og þá síðustu í október 2001. Michael Owen gerði sex þrennur í Úrvalsdeild. Fyrst í febrúar 1998 og síðast í apríl 2003.

Í 4. sæti á listanum yfir þrennukónga Liverpool frá 1992 er Steven Gerrard með fimm þrennur. Hans fyrsta hat-trick kom í undankeppni Meistaradeildar sumarið 2005, þgar Liverpool lagði TNS að velli 0-3. Síðasta þrenna Gerrard á Liverpool ferlinum er öllu minnisstæðari, en hún kom í dísætum 3-0 sigri gegn Everton á Anfield í mars 2012.

Eins og áður segir eru Divock Origi og Daniel Sturridge þeir einu í núverandi liði Liverpool sem eiga skráða þrennu fyrir félagið. Sturridge skoraði sína þrennu í 3-1 sigri á Fulham vorið 2013.