Spáð í spilin

Síðasti leikur ársins hjá okkar mönnum og jafnframt Úrvalsdeildarinnar sjálfrar á árinu 2015 er viðureign okkar manna við Sunderland á Stadium of Light.

Þetta er fyrsti leikur Liverpool af fjórum útileikjum í röð og það sem meira er þá eru þessir fjórir leikir leiknir á 10 dögum en 2. janúar er deildarleikur við West Ham, 5. janúar er fyrri leikur undanúrslita Deildarbikarsins gegn Stoke og loks má nefna heimsókn til Exeter City í 3. umferð enska FA bikarsins þann 8. janúar. En hugum fyrst að leik kvöldsins gegn Sunderland sem hefst kl. 19:45.

Jurgen Klopp er sem fyrr að glíma við töluverð meiðslavandræði í leikmannahópnum en fyrir utan þessa fjóra sem hafa verið meiddir lengi (Sturridge, Ings, Gomez og Flanagan) eru þeir Divock Origi, Martin Skrtel, James Milner og Jordan Rossiter ekki klárir í þennan leik. Heimamenn í Sunderland eru ekki að glíma við sömu vandamál en þeir Younes Kaboul, Adam Matthews og Sebastian Larsson eru allir frá vegna meiðsla. Tveir fyrrum leikmenn Liverpool verða ábyggilega í byrjunarliðinu hjá Sam Allardyce, þeir Fabio Borini og Sebastian Coates. Það er óskandi að hvorugur nái að gera eitthvað af viti gegn sínum gömlu félögum.

Það er töluvert undir í leik kvöldsins því okkar menn geta með sigri komist upp að hlið Manchester United í 6. sæti deildarinnar með 30 stig. Liðið situr núna í 10. sætinu með 27 stig og markatöluna -1 sem er auðvitað afleit markatala ef út í það er farið. Sunderland menn eru í fallbaráttu og sitja í næstneðsta sæti með 12 stig og geta ekki komist ofar í töflunni þó þeir taki öll stigin í kvöld.

Síðast þegar þessi lið mættust í deildinni á þessum velli sigruðu okkar menn 0-1 með marki frá Lazar Markovic á 9. mínútu. Heimamenn léku einum færri frá 49. mínútu þegar Liam Bridcutt fékk að líta rauða spjaldið. Leikurinn fór fram 10. janúar á þessu ári og Liverpool voru eftir leikinn í 8. sæti deildarinnar. Annars hefur þessi leikvangur verið ágætur hvað úrslit varðar fyrir gestina, af síðustu sex leikjum hafa fjórir unnist, tveir tapast (einn af þeim var sundboltaleikurinn frægi) og einu sinni hafa liðin skilið jöfn. En það er ljóst að verkefni kvöldsins er erfitt. Stjóri mótherjanna er Sam Allardyce og honum hefur oftar en ekki tekist ágætlega upp gegn Liverpool, lætur liðin sín berjast og tuddast út um allan völl og það er ákkúrat það sem hann mun reyna í þessum leik. Það þarf ekkert að horfa á marga leiki með Liverpool það sem af er tímabili til að sjá að oftar en ekki geta lið einfaldlega yfirbugað Rauða herinn þegar menn eru fastari fyrir og harðir í horn að taka. Auk þess er niðurstaðan oftar en ekki ansi dræm þegar Liverpool mætir liði í fallbaráttu á útivelli. Vonandi verður það ekki uppá teningnum í kvöld.

Jurgen Klopp hefur rætt um að það sé eitthvað sem hann og þjálfarateymið hafa reynt að laga með því að hamra á því við leikmenn að þeir eigi að vera fastari fyrir. En stundum byrja leikir einfaldlega þannig að maður sér strax í upphafi hvort að leikmenn Liverpool séu tilbúnir í slaginn eða ekki.  Við skulum þó vona að allir verði klárir í að berjast til síðasta blóðdropa í síðasta leik ársins. Það er ansi þétt spilað þessa dagana og vonandi lætur þreytan ekki til sín taka hjá leikmönnum Liverpool.

Spáin að þessu sinni er sú að 3 stig verði niðurstaða kvöldsins, lokatölur 1-3 þar sem heimamenn skora fyrst en gestirnir jafna metin og klára svo dæmið örugglega. Þetta er mögulega óskhyggja svona seint á árinu en þessi mikilvægu stig sem eru í boði í kvöld falla Jurgen Klopp og hans mönnum í skaut.