Spáð í spilin

Liverpool fær Tottenham í heimsókn á Anfield seinnipartinn á morgun. Eftir hrakfarirnar gegn Southampton fyrir landsleikjahlé er nauðsynlegt að liðið girði sig í brók og landi sigri. 

Það hefði kannski einhverntíma þótt sjálfsagt að ætlast til þess að Liverpool tæki Tottenham á heimavelli en eins og staðan er í dag er næstum því óraunhæft að ætlast til þess. Tottenham er langt fyrir ofan okkur í deildinni, er í bullandi baráttu við Leicester um Englandsmeistaratitilinn meðan Liverpool svamlar um miðja deild og dæmdi sig svo að segja endanlega úr leik í baráttunni um topp 4 sæti með tapinu gegn Southampton í páskafríinu. 

Það veit sá sem allt veit að sá sem þetta ritar óskar þess heitar en hægt er að ímynda sér að Liverpool vinni Tottenham á morgun. Ekki bara af því að ég vil alltaf sjá liðið mitt vinna og með sigri er ennþá veik von um topp 4 sæti, heldur líka vegna þess að með sigri minnka líkurnar á því að Tottenham vinni deildina. Það má bara ekki gerast að liðið sem við höfum borið okkur svo mikið saman við undanfarin ár fari alla leið. Þá vil ég miklu frekar öskubuskuævintýri Leicester. 

En hvað sem því líður þá er Tottenham auðvitað sterkt lið, en það gæti gefið okkur ákveðið forskot á morgun að Lundúnaliðið er með alla pressuna á sér. Liðið þarf nauðsynlega á sigri að halda ef það ætlar að velgja Leicester undir uggum. Spurs er með 61 stig í 2. sæti, fimm stigum minna en topplið Leicester þegar bæði lið eiga aðeins 7 leiki eftir.
Tottenham var fyrsta liðið sem Liverpool mætti undir stjórn Jürgen Klopp, en liðin gerðu markalaust jafntefli í frumraun Þjóðverjans þann 17. október s.l. Eftir landsleikjahlé, rétt eins og núna. Síðan þá hefur auðvitað margt jákvætt gerst hjá okkar mönnum, en það er þó ófrávíkjanleg staðreynd að gengi Tottenham hefur verið mun betra í deildinni.

Lundúnaliðið hefur skorað allra liða mest í deildinni í vetur, alls 56 mörk, og munar þar mestu um Harry Kane sem hefur skorað 21 mark, eftir fremur rólega byrjun í haust. Til samanburðar er markahæsti maður Liverpool í deildinni, Roberto Firmino, með 8 mörk. 7 þeirra hafa komið eftir áramótin þannig að hans byrjun var ennþá rólegri en hjá Kane.

Tottenham hefur einnig fengið fæst mörk á sig í deildinni. Alls 24 í 31 leik sem gerir 0,77 mark að meðaltali í leik. Okkar menn hafa fengið á sig 40 mörk í 29 leikjum, eða 1,38 í leik. Tottenham er úr leik í öllum öðrum keppnum, datt nú síðast út úr Evrópudeildinni eftir viðureign við Borussia Dortmund, þannig að lærisveinar Pochettino geta einbeitt sér 100% að því að ná í skottið á spútnikliði Leicester og vinna deildina í fyrsta sinn síðan 1961.