Sturridge alls ekki á förum

Allskonar sögusagnir um óánægju Daniel Sturridge hjá Liverpool hafa sprottið upp reglulega það sem af er ári.  Hann sjálfur segir sögurnar eiga sér enga stoð í raunveruleikanum og segir að hann vilji vera hluti af þeim góðu stundum sem séu í vændum hjá félaginu.

Sturridge fullyrðir að það hafi aldrei neitt komið uppá hjá honum og Klopp og segist ólmur vilja vera áfram á Anfield.  Hann spilaði frábærlega á fimmtudagskvöldið var gegn Villarreal og segist sjálfur vera kominn í sitt besta form eftir að hafa komist yfir öll þau meiðslavandræði sem hafa hrjáð hann undanfarin ár.

Sem dæmi um þá vinnu sem Sturridge hefur lagt á sig til að komast aftur út á völlinn hefur hann ekki tekið sér einn frídag síðan hann sneri til baka úr meiðslum í febrúar.

,,Ég er ánægður hér," segir Sturridge.  ,,Ég hef aldrei sýnt eða gefið í skyn að ég sé ekki ánægður hér.  Ég held að einhverjir séu að búa til sögur og reyna að rugga bátnum.  Menn sjá að ég hef ekki alltaf verið í byrjunarliði og þá halda þeir að ég sé ekki ánægður með stöðu mína hjá félaginu en þegar upp er staðið þá er það stjórinn sem er að vinna sitt starf."

,,Hann þarf að velja liðið sem hann telur að henti best á hverjum tíma.  Ég hef líka mitt verk að vinna, að vera klár þegar ég er valinn í liðið.  Það hefur aldrei verið neitt einasta vandamál á milli mín og stjórans.  Aldrei.  Það hefur aldrei verið neitt af minni hálfu og ég held það hafi aldrei verið neitt af hans hálfu heldur.  Hans starf er að velja liðið.  Þetta er leikur liðsheildarinnar og ef hann velur einhvern annan þá þarf ég að sætta mig við það."

,,Ég get auðvitað orðið ósáttur ef ég spila ekki.  Það er eðlilegt fyrir hvaða leikmann sem er.  Maður verður bara að taka ákvörðuninni og halda áfram.  Þegar maður spilar þarf maður svo að passa uppá að vera rétt stemmdur."

Sturridge hafði verið á bekknum í síðustu þrem Evrópuleikjum þegar kom að seinni leiknum við Villarreal.  Hann greip tækifærið fegins hendi og spilaði frábærlega.  Fagnaðarlætin þegar hann skoraði annað mark leiksins sýndu og sönnuðu hversu þýðingarmikið markið var fyrir hann.

,,Ég held ég hafi fagnað svona mikið af því að þetta var svo stór leikur fyrir okkur," segir hann.  ,,Eftir fyrsta færið sem ég fékk hugsaði ég hvernig gat boltinn ekki endað í netinu þannig að ég vildi bæta upp fyrir það og ég þakka Guði fyrir að ég gat það.  Þetta er mikilvægasta mark sem ég hef skorað fyrir félagið, en vonandi munu koma enn stærri leikir og mikilvægari mörk í framtíðinni."

,,Kvöldið var mikilvægt fyrir félagið og úrslitin stórkostleg fyrir okkur, stuðningsmennina og félagið.  Það er enginn vafi á því að mér finnst ég núna vera í toppstandi.  Það eru nokkrir mánuðir síðan ég sneri til baka og ég hef ekki tekið mér einn dag í frí.  Ég er ekki að monta mig af því, ég hef bara ekki tekið mér einn frídag og þegar aðrir leikmenn hafa fengið frí hef ég verið mættur á Melwood."

,,Ég hef aðallega verið að gera auka æfingar, hvort sem það eru hreinar æfingar eða æfingar til að ná aftur jafnvægi í líkamanum.  Ég hef mætt á svæðið og unnið, ég er ekkert að reyna að búa til neina sorgarsögu.  Þegar upp er staðið fáum við greitt fyrir að gera þetta og þetta er minn draumur.  Ég get ekki kvartað.  Ég er bara þakklátur Guði fyrir tækifærið til að vera hér."

Sturridge hefur oft þurft að horfa uppá Divock Origi og Roberto Firmino byrja leiki og mátt sætta sig við bekkjarsetu undanfarnar vikur.  Það hefur vakið upp spurningar um hvort að Klopp vilji nota Sturridge yfirhöfuð og hvort að hann hugsi sér ekki til hreyfings frá félaginu.

Sturridge segist hinsvegar geta höndlað það að vera sífellt á milli tannana á fólki og er tilbúinn til að sýna og sanna að hann eigi byrjunarliðssætið skilið.

,,Við erum að spila fyrir stórt félag og pressan fylgir því.  Maður þarf að höndla það á hverjum degi.  Þið þekkið mig, ég er með eins mikla trú og hægt er að hafa á mínum eigin hæfileikum.  Ég reyni alltaf að búa til færi fyrir liðið.  Ef ég skora ekki þá reyni ég að vera ógnandi fyrir mótherjann og skapa færi.  Ég efast aldrei um sjálfan mig eða hæfileika mína.  Ég þarf ekki að tala um aðra leikmenn.  Ég einbeiti mér að sjálfum mér og verkefninu sem þarf að takast á við úti á vellinum."

,,Ég held ekki að áskorunin sé meiri núna.  Áður fyrr spilaði ég með Luis Suarez sem er núna hjá Barcelona og skorar mikið af mörkum þar.  Það sama gildir um aðra leikmenn sem hafa farið annað.  Eins og t.d. Raheem Sterling.  Ég var einnig að berjast um sæti í liðinu við þá og þá, líkt og nú, var ég ekki ánægður ef ég byrjaði ekki."

,,Það er verk félagsins að fá inn nýja leikmenn.  En ég veit hvað ég get gert úti á vellinum.  Ég hef verið hér í meira en þrjú ár.  Hef verið meiddur og verið inn og út úr liðinu undanfarna mánuði en ég hef aldrei verið óánægður hér.  Ég er þakklátur félaginu fyrir tækifærið til að koma hingað frá Chelsea.  Ég er þakklátur Brendan Rodgers fyrir að kaupa mig líka.  Nú hefur Jurgen komið inní þetta og hann gefur mér mínútur á vellinum.  Vonandi er þetta byrjunin á einhverju sérstöku hjá félaginu."

Sevilla er liðið sem þarf að vinna í úrslitaleiknum í Basel þann 18. maí.  Eftir að hafa komist ansi nálægt því að vinna enska titilinn og hafa einnig tapað tveim undanúrslitaleikjum með félaginu, í FA bikar og Deildarbikar og svo Deildarbikarúrslitaleiknum sjálfum, vill Sturridge ólmur bæta bikurum í safnið hjá Liverpool.

,,Ég var lengi að jafna mig á því að við unnum ekki deildina hér.  Ég hef aldrei komist eins nálægt því eftir að ég yfirgaf Chelsea, að vinna eitthvað svona stórt," bætir hann við.  ,,Deildarbikartapinu var einnig erfitt að taka.  Ég grét eftir leikinn, ekki bara útaf því að við töpuðum heldur af því að þetta var okkar stund.  Við vildum færa hlutina uppá næsta stig í þessum leik en við höfðum ekki heppnina með okkur."

,,Við höfum lært af þessu og núna bíður annar úrslitaleikur.  Sevilla hafa unnið þennan bikar síðustu tvö ár.  Þetta er ekki nýtt fyrir þeim en Liverpool hefur áður unnið þennan bikar og við viljum gefa stuðningsmönnunum eitthvað til að syngja um.  Þetta er nýr leikur fyrir okkur til að sýna okkur og sanna á hinu stóra sviði og standa undir þeim væntingum sem til okkar eru gerðar."