Munum berjast þar til yfir lýkur!

Jordan Henderson, fyrirliði Liverpool, segir að leikmenn Liverpool muni berjast um Englandsmeistaratitilinn þar til yfir lýkur. Sigurinn í Cardiff var mikilvægur í þeirri baráttu.  

,,Þetta voru mikilvæg úrslit fyrir okkur og við ætlum okkur að berjast þar til yfir lýkur. Það gerum við með því að vinna leiki. Þetta var svolítið öðruvísi áskorun fyrir okkur en mér fannst við ná að takast mjög vel á við hana. Við verðum að halda trúnni, hafa sjálfstraust og vinna eins marga leiki og við getum. Við vissum að þetta yrði erfiður leikur. Það var mjög heitt og þess vegna var erfitt að spila en það var eins fyrir bæði liðin."

,,Þeir voru að berjast fyrir lífi sínu og því vissum við að verkefnið yrði erfitt. Við urðum að sýna þolinmæði, halda áfram að reyna að brjóta þá á bak aftur og halda góðu skipulagi í vörninni. Í heild getum við verið ánægðir með hvernig við spiluðum og auðvitað að hafa náð þremur stigum."