Ný met!

Metin falla! Það bættust fleiri met við afrekaskrá Liverpool þegar liðið lagði Chelsea að velli 1:2 á Stamford Bridge á sunnudaginn. Segja má að ný met bætist við um hverja helgi!

Liverpool hefur nú unnið sjö deildarleiki í röð á útivelli. Það er nýtt félagsmet!

Sigurinn á Stamford Bridge þýðir að Liverpool er fyrsta liðið til að vinna sex fyrstu deildarleiki sína í efstu deild tvær leiktíðar í röð.

Sigurinn var sá 15. í röð í deildinni og það er bæting frá því um síðustu helgi. Liverpool skoraði tvö mörk í leiknum og þar með bættist við metið með 15 sigra í röð þar sem liðið hefur skorað minnst tvö mörk í hverjum þeirra leikja. 


Leikurinn var númer 150 í deildinni sem  Jürgen Klopp stýrir Liverpool. Í þessum 150 leikjum hefur Liverpool unnið 92 leiki. Enginn framkvæmdastjóri í sögu Liverpool hefur unnið fleiri leiki í fyrstu 150 deildarleikjum sínum með liðið!