Matip og Keita meiddir

Joel Matip fór meiddur af velli í leiknum gegn West Brom í gær. Þá missir Naby Keita einnig af næstu leikjum vegna meiðsla.

Matip haltraði af velli um miðjan seinni hálfleik í gær og er talið að meiðslin séu í svokölluðum aðfærsluvöðva við liðamót í fætinum. Hann fer í myndatöku í dag þar sem staðan á honum verður metin em Klopp sagði á blaðamannafundi eftir leikinn í gær að þetta liti ekki vel út. 

Matip hefur þegar misst af meira en helmingi tímabilsins vegna meiðsla, nú síðast meiddist hann á baki gegn Fulham sem varð til þess að hann missti af sigurleiknum gegn Tottenham.

Naby Keita varð fyrir vöðvatognun á æfingu og var þess vegna ekki í hópnum í leiknum í gær. Klopp segir að hann muni líka missa af leiknum gegn Newcastle á miðvikudaginn en að öðru leyti sé óljóst hversu lengi hann verður frá.