Spáð í spilin

Fyrsti leikur Liverpool á því Herrans ári 2021 fer fram í Southampton á mánudagskvöldið. Eftir tvö jafntefli í röð gegn liðum í neðri hluta deildarinnar verður Liverpool að koma sér aftur í gang. Annað dugar ekki. Þó Liverpool leiði deildina, nú á markahlutfalli, er góður hópur skammt að baki. Liverpool mun því þurfa duglega að hafa fyrir því að að verja titilinn. Svo fremi að Liverpool fari að spila aftur af þeim krafti og getu sem meistararnir geta þá verður liðið Englandsmeistari í vor!


En það dugar ekkert annað en að sýna sitt besta eða nærri því besta í hverjum einasta leik. Bæði gegn sterkustu liðunum og honum sem eru ekki jafn sterk. Meiðsli lykilmanna hafa auðvitað bitnað mikið á gengi Liverpool. Þrátt fyrir öll meiðslin er Liverpool efst og það segir sitt um styrk liðsins. Það er mikið gleðiefni að Thigo Alcantara skuli vera leikfær eftir langt hlé. Ef hann kemst í gang mun hann styrkja liðið mikið. 

Southampton er með gott lið og hefur náð góðum úrslitum á köflum. Segja má að leikurinn sé kannski svipaður fyrirfram og sá við Newcastle United um daginn. Liverpool átti að vinna hann miðað við gang leiksins en náði ekki. Það má ekki gerast í Southampton. Það þarf að nýta færin og gera út um leiki þegar kostur gefst á. Ég spái því að Liverpool merji 1:2 sigur. Sadio Mané og Alex Oxlade-Chamberlain skora mörkin.

Gleðilegt nýtt ár!

YNWA!